Հաիթիի արտգործնախարարը շնորհակալություն է հայտնել հայ փրկարարներին
ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ արտաքին գործերի նախարար Էդվարդ Նալբանդյանն ու Հաիթիի արտաքին գործերի և պաշտամունքի նախարար Լեներ Ռենոյն հանդիպման ժամանակ ընդգծել են, որ Ֆրանկոֆոնիան միավորող դեր ունի տարբեր երկրների ժողովուրդների և մշակույթների միջև: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, ՀՀ ԱԳ նախարարը խորհրդանշական է համարել այս օրերին՝ նախարարական համաժողովի կապակցությամբ Հաիթիի մշակույթը ներկայացնող խմբի հյուրախաղերը Երևանում։
Լեներ Ռենոն էլ նշել է, որ ուրախ է Հայաստանում գտնվելու համար:
Հանդիպման ընթացքում կողմերը քննարկել են երկու երկրների միջև իրավապայմանագրային դաշտի ձևավորման, միջազգային կազմակերպությունների շրջանակներում համագործակցության հաստատման հնարավորությունները: Հաիթիի արտաքին գործերի և պաշտամունքի նախարարն իր երախտագիտությունն է արտահայտել Հայաստանին և հայ փրկարարներին, որոնք իրենց պատրաստակամությունն էին հայտնել 2010թ. ձմռանը Հաիթիում տեղի ունեցած ավերիչ և ողբերգական երկրաշարժից տուժած քաղաքացիներին օգնության ձեռք մեկնելու համար:
Բաժանորդագրվեք մեր ալիքին Telegram-ում