ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: «Բարգավաճ Հայաստան» կուսակցությունը դեռևս չի քննարկել սահմանադրական հանրաքվեի  քարոզարշավին մասնակցել-չմասնակցելու հարցը: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանն այս մասին ասաց ԱԺ ԲՀԿ խմբակցության քարտուղար Վահե Էնֆիաջյանը: «Սակայն պետք է հայտարարեմ, որ «Բարգավաճ Հայաստան» կուսակցությունը ներկայացրել է իր դիրքորոշումը սահմանադրական բարեփոխումների հարցում և ունի հիմնավորումները, թե ինչու է կողմ արտահայտվել սահմանադրական բարեփոխումներին: Այդ հիմնավորումները և մեր դիրքորոշումն այս հարցում  մենք պետք է ներկայացնենք նաև հասարակությանը»,- «Արմենպրես»-ի հաղորդմամբ՝ ընդգծեց Էնֆիաջյանը:

Նրա խոսքով՝ մինչև սահմանադրական բարեփոխումների հանրաքվեն ԲՀԿ քաղաքական խորհրդի անդամները, կուսակցության տարածքային կառույցների ղեկավարները, պատգամավորները ակտիվ մասնակցություն են ունենալու տարբեր հաղորդաշարերի, ունենալու են հանդիպումներ և ներկայացնելու են կուսակցության դիրքորոշումն ու հիմնավորումները:

ՀՀ նախագահ Սերժ Սարգսյանը հրամանագիր է ստորագրել, որի համաձայն՝ սահմանադրական բարեփոխումների  հանրաքվեն տեղի կունենա 2015թ. դեկտամբերի 6-ին: Մինչ այդ Ազգային ժողովը ձայների բացարձակ մեծամասնությամբ սահմանադրական բարեփոխումների նախագիծը հանրաքվեի դնելու որոշում էր կայացրել: