Human Rights Watch-ը Յունուսների վերաբերյալ հայտարարություն է տարածել
ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Human Rights Watch միջազգային իրավապաշտպան կազմակերպությունը հայտարարություն է տարածել Ադրբեջանում դատապարտված իրավապաշտպաններ Լեյլա եւ Արիֆ Յունուսների վճռաբեկ բողոքը Բաքվի դատարանում հոկտեմբերի 12-ին քննության առնվելու կապակցությամբ, որում ադրբեջանական իշխանություններից պահանջել է հանել բոլոր մեղադրանքները եւ ազատ արձակել զույգին:
Ինչպես հաղորդում է «Արմենպրես»-ը` վկայակոչելով «Թուրան» լրատվական գործակալությունը, HRW-ի Եվրոպայի եւ Կենտրոնական Ասիայի գծով փոխտնօրեն Ռեյչել Դենբերն այդ առնչությամբ ասել է. «Դատարանը կարող է քայլ կատարել Ադրբեջանում օրինականության եւ արդարության վերականգնման ուղղությամբ»:
Դենբերը նաեւ հավելել է, որ «այդ մարդկանց նկատմամբ դատն ու բանտում նրանց պահելը ծաղր է արդարադատության նկատմամբ»:
«Ադրբեջանցի գործընկերները պետք է հստակ հայտարարեն, որ Բաքվի հետ իրենց հարաբերությունները կախված են օրենքի գերակայության նկատմամբ կառավարության նվիրվածությունից: Այն, որ Լեյլա եւ Արիֆ Յունուսները մինչեւ այժմ բանտում են, եւ նրանց վրայից հանված չեն պետական դավաճանության շինծու մեղադրանքները, խոսում է այն մասին, որ իշխանությունները մտադիր չեն հետեւել օրենքի գերակայությանը», -ասել է Դենբերը:
2012 թվականից Ադրբեջանի կառավարությունը հետապնդում, վախեցնում եւ ձերբակալում է տասնյակ ակտիվիստների եւ իրավապաշտպանների, անկախ լրագրողների, քաղաքական գործիչների, բլոգերների:
Լեյլա Յունուսը օգոստոսի 13-ին դատապարտվել էր 8,5 տարվա ազատազրկման, իսկ նրա ամուսինը` Արիֆ Յունուսը` 7 տարվա ազատազրկման: Զույգը նաեւ մեղադրվել է պետական դավաճանության մեջ, ինչի համար նրանց պետք է դատեն ավելի ուշ:
Լեյլա Յունուսը Ադրբեջանի առաջատար իրավապաշտպաններից է, հանդիսանում է Խաղաղության եւ ժողովրդավարության ինստիտուտի տնօրենը, իսկ փորձագետ Արիֆ Յունուսը պատմաբան է:
Երկուսն էլ տառապում են խրոնիկական հիվանդություններով եւ անհետաձգելի բուժման կարիք ունեն: Լեյլա Յունուսը տառապում է շաքարային հիվանդության ծանր տեսակով, հեպատիտ C-ով, հիպերտոնիայով եւ այլն: Արիֆ Յունուսը կալանման մեջ գտնվելու ընթացքում սրտի եւ հիպերտոնիկ մի շարք կաթվածներ է տարել:
Բաժանորդագրվեք մեր ալիքին Telegram-ում