Իշխող Հանրապետականն արդար և թափանցիկ հանրաքվեին այլընտրանք չի տեսնում
ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Սահմանադրական բարեփոխումների հանրաքվեի արդար և թափանցիկ անցկացմանն այլընտրանք չկա: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանը այս մասին ասաց ԱԺ ՀՀԿ խմբակցության ղեկավար Վահրամ Բաղդասարյանը: «Հանրաքվեն պետք է լինի հնարավորինս թափանցիկ, որովհետև մենք գործ ունենք մայր օրենքի հետ, սրան հետևում է ողջ միջազգային հանրությունը: Ես հորդորում եմ բոլոր քաղաքական ուժերին, ինչպես նաև հասարակությանը, ապահվել թափանցիկություն: Իշխանություններն ամեն ինչ պետք է անեն, որ հանրաքվեն անցնի թափանցիկ և արդար»,- «Արմենպրես»-ի փոխանցմամբ՝ նշեց Բաղդասարյանը:
Միևնույն ժամանակ, պատգամավորը նկատեց, որ ինչպես էլ անցնի հանրաքվեն, կլինեն տարբեր քննադատություններ: «Կլինեն քննադատողներ, որովհետև կլինեն մարդիկ, որ իրենց կարծիքն արդարացնելու համար քննադատելու են: Սակայն ես կրկնում եմ, որ իշխանություններն ամեն ինչ անելու են, որպեսզի հանրաքվեն անցնի ամենաբարձր մակարդակով, լինի թափանցիկ և ընկալելի նաև միջազգային հանրության համար»,- հավելեց Բաղդասարյանը:
Հարցին` եթե ժողովուրդը «ոչ» ասի սահմանադրական բարեփոխումներին, ի՞նչ են անելու իշխանությունները, Վահրամ Բաղադասարյանը պատասխանեց. «Ես չեմ կարծում, որ ինչ-որ պայթյունավտանգ բան կլինի: Չեն անցնի սահմանասրական փոփոխությունները, կշարունակի գործել գործող Սահմանադրությունը»:
ՀՀ նախագահ Սերժ Սարգսյանը հրամանագիր է ստորագրել, որի համաձայն՝ սահմանադրական բարեփոխումների հանրաքվեն տեղի կունենա 2015թ. դեկտամբերի 6-ին: Մինչ այդ Ազգային ժողովը ձայների բացարձակ մեծամասնությամբ սահմանադրական բարեփոխումների նախագիծը հանրաքվեի դնելու որոշում էր կայացրել:
Բաժանորդագրվեք մեր ալիքին Telegram-ում