Ցիպրասը նշել է Հունաստանի կառավարության գլխավոր խնդիրները
ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: Հունաստանի կառավարության գլխավոր խնդիրներն են՝ օգնության երրորդ ծրագրի շուրջ վարկատուների հետ ստորագրված համաձայնագրերի կատարումը, ֆինանսական կայունության եւ տնտեսության աճի վերականգնումը, պետական պարտքի բեռի էական թեթեւացումը, արմատական բարեփոխումները պետական կառավարման ոլորտում, կոռուպցիայի եւ բյուրոկրատիայի դեմ պայքարը: Այդ մասին, ինչպես տեղեկացնում է «Արմենպրես»-ը, հայտարարել է երկրի վարչապետ Ալեքսիս Ցիպրասը՝ ծրագրային հայտարարությամբ հանդես գալով խորհրդարանում:
«Այս խնդիրների կատարումը վարկատուների ու հուշագրերի հսկողությունից երկիրը դուրս բերելու միակ անվտանգ եղանակն է»,- հայտարարել է Ցիպրասը:
Նա նշել է, որ չորս տարի անց Հունաստանը հետեւում կթողնի ճգնաժամն ու հուշագրերը:
Վարչապետի ծրագրային հայտարարությունը նախատեսված է օրենսդրությամբ: Երեք օրվա ընթացքում տեղի է ունենալու դրա քննարկումը, իսկ լույս հոկտեմբերի 8-ի գիշերը քվեարկություն կանցկացվի կառավարությանը վստահության հարցի շուրջ: ՍԻՌԻԶԱ կուսակցության եւ «Անկախ հույների» կոալիցիոն կաբինետը 155 տեղ ունի 300-տեղանոց խորհրդարանում, եւ վստահության քվեն պետք է հաստատի, որ նա կկարողանա անցկացնել անհրաժեշտ օրենքները, հաղորդել է ՌԻԱ Նովոստին:
Լուսանկարը` EPA
Բաժանորդագրվեք մեր ալիքին Telegram-ում