ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: «Սոչի 2015» միջազգային ներդրումային համաժողովի շրջանակներում Եվրասիական տնտեսական հանձնաժողովի անդամ Տիմուր Սուլեյմանովը հայտարարել է, որ ԵԱՏՄ երկրների ընդհանուր ֆինանսական շուկայի գործառնության մեխանիզմների ձևավորման շուրջ աշխատանքներն անհրաժեշտ է սկսել արդեն այժմ: Այս մասին հայտնում է «Արմենպրես»-ը` վկայակոչելով ԵՏՀ հաղորդագրությունը: «Հարկ ենք համարում «Աստանա» միջազգային ֆինանսական կենտրոնի հիմքի վրա ստեղծել աշխատանքային խումբ, որի կազմի մեջ կմտնեն անկախ փորձագետներ, ովքեր կաշխատեն ԵԱՏՄ անդամ պետությունների ընդհանուր ֆինասնական շուկայի գործառնության մեխանիզմների ձևավորման ուղղությամբ»,- իր ելույթում նշել է հանձնաժողովի ներկայացուցիչը:

Համաձայն ԵԱՏՄ պայմանագրի` անդամ պետությունները պետք է ավարտեն ֆինանսական շուկաների ոլորտում օրենսդրությունների ներդաշնակեցումը 2025-ին և որոշում ընդունեն ֆինանսական շուկայի կարգավորման միջազգային մարմնի գործառույթների և լիազորությունների վերաբերյալ:

Ընդհանուր ֆինանսական շուկայի ձևավորման համար Եվրասիական տնտեսական հանձնաժողովի կողմից պատրաստվել են երկու առանցքային համաձայնագրեր` Ֆինանսական շուկաներում գործունեության իրականացման պահանջների մասին համաձայնագիրն ու ֆինանսական շուկաներում կապիտալի ազատ տեղաշարժի ապահովման համար ֆինանսական ոլորտում տեղեկատվության, այդ թվում` գաղտնի, փոխանակման մասին համաձայնագիրը:

Ներկայում Հանձնաժողովը ազգային ներկայացուցիչների հետ մշակում է օրենսդրության ներդաշնակեցման ծրագիրը: