«Ամերիաբանկի» հաճախորդները կկարողանան առանց վճարային քարտերի գումար կանխիկացնել բանկոմատից
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: «Ամերիաբանկ» փակ բաժնետիրական ընկերությունը մեկ տարվա ընթացքում Հայաստանի ֆինանսական շուկայում կներդնի հեռահար սպասարկման նոր` Bank World, բանկային համակարգը, որը հաճախորդներին կապահովի ստանդարտացված հասանելիություն բոլոր տիպի ծառայությունների համար: «Արմենպրես»-ի փոխանցմամբ` հոկտեմբերի 5-ին «Ամերիաբանկի» և իռլանդական CR2 ընկերության միջև կնքվեց հեռահար բազմաֆունկցիոնալ բանկային ծառայությունների նոր համակարգի պայամանագիր: Սա իռլանդական ընկերության առաջին նախագիծն է Հայաստանում: «Ամերիաբանկը» բարձր է գնահատում CR2-ի հետ գործընկերային հարաբերությունների հաստատումը: Այս նախաձեռնությունն ուղղված է «Ամերիաբանկի» ռազմավարական նպատակներից մեկի իրագործմանը, այն է` ժամանակակից տեխնոլոգիաների միջոցով հաճախորդներին առաջարկել ինքնասպասարկման և նորարար հեռահար բանկային ծառայությունների ամբողջական փաթեթ»,- նշեց «Ամերիաբանկի» գլխավոր տնօրեն Արտակ Հանեսյանը` հույս հայտնելով, որ ներդրվող համակարգը կնպաստի հեռահար բանկային սպասարկման մշակույթի զարգացմանը Հայաստանում:
«Նոր պայմանագրով CR2-ն «Ամերիաբանկ»-ին տրամադրում է հեռահար բանկային սպասարկման նոր եզակի լուծում: Մենք կասկած չունենք, որ այս համակարգը բանկին թույլ կտա ավելի ամրապնդել իր առաջատար դիրքը շուկայում: Այսուհետև հաճախորդները կարող են ոչ միայն օգտվել շուկայում առկա ծառայությունների ամենամեծ փաթեթից, այլև վայելել արագ և հարմար սպասարկման բոլոր առավելությունները»,- իր հերթին ասաց CR2-ի Գործադիր խորհրդի անդամ և կոմերցիոն տնօրեն Կիեռան Կիլքուլլեն:
Bank World համակարգը հասանելի կլինի 24 ժամ 7 օր ինքնասպասարկման սարքավորումների` բանկոմատների, վճարային տերմինալների, ինչպես նաև ժամանակակից ինտերնետ և մոբայլ բանկային համակարգի միջոցով: Այս համակարգը թույլ է տալիս բանկային ինքնասպասարկման սարքերի և հեռահար կապուղիների ինտերֆեյսը և առաջարկվող ծառայությունների տեսականին ավտոմատ կերպով համարեցնել տվյալ հաճախորդի սեգմենտին` ապահովելով անհատականացված սպասարկում և առավելագույն հարմարություն: Բանկոմատները կվերածվեն անհատականացված սպասարկման կետերի, որտեղ հաճախորդը կարող է հեշտությամբ կառավարել իր բոլոր բանկային հաշիվները, բանկին ուղղել տարբեր հայտեր և իրականացնել մի շարք գործարքներ, որոնք նախկինում հասանելի էին միայն Ինտերնետ բանկինգի միջոցով: Հաճախորդները բանկից կստանան անհատական առաջարկություններ` մշակված հատուկ իրենց համար: Անգամ առանց վճարային քարտերի օգտագործման ստացված գումարները հնարավոր կլինի կանխիկացնել բանկոմատից:
Ֆիզակական անձ և իրավաբանական անձ հաճախորդների համար կստեղծվեն գործառնությունների ավելի լայն հնարավորություններ գործարքներ իրականացելու ըստ իրենց հարմարության, Ինտերնետ և Մոբայլ բանկինգի, ինչպես նաև ինքնասպասարկման սարքերի միջոցով իրականացնել անձնական դրամական փոխանցումներ (P2P payments)` օգտագործելով ստացողի հեռախոսահամարը կամ նույնականացման որևէ այլ տվյալ:
Համակարգն ամբողջովին ակնկալվում է ներդնել 12 ամսում:
Բաժանորդագրվեք մեր ալիքին Telegram-ում