Թուրքեշը հեռացվել է իր իսկ հոր հիմնադրած «Ազգայնական շարժում» կուսակցությունից
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Թուրքիայի «Ազգայնական շարժում» կուսակցության (ԱՇԿ) կարգապահական կոմիտեն որոշում է կայացրել կուսակցությունից հեռացնել ԱՇԿ հիմնադրի` Արփարսլան Թուրքեշի որդուն` Թուղրուլ Թուրքեշին: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:
Ազգայնական կուսակցության ղեկավարությունը դժգոհել էր այն բանից, որ Թուրքեշը համաձայնվել էր երկրի վարչապետ Ահմեդ Դավութօղլուի` փոխվարչապետ դառնալու առաջարկին: Ի պատասխան կուսակցությունից հնչեցված մեղադրանքերի` Թուղրուլ Թուրքեշն ասել էր. «Իմ` փոխվարչապետ լինելու շնորհիվ կուսակցությունս` ԱՇԿ-ն, դարձավ իշխանություն»:
Դեռևս օգոստոսի 29-ին, անդրադառնալով կուսակցությունից հեռացման վերաբերյալ խոսակցություններին, գործիչն ասել էր. «Պարոն Բահչելին կարող է ինձ չներառել ընտրացուցակում, հեռացնել կուսակցության ղեկավարի տեղակալի պաշտոնից, սակայն ԱՇԿ-ից հեռացնել չի կարող: ԱՇԿ-ն իմ հոր կուսակցությունն է: ԱՇԿ-ն ինձ համար միակն է: Ոչ ոքի ուժը չի պատի ինձ հեռացնել այս կուսակցությունից»:
Ի պատասխան նման հայտարարությունների` ԱՇԿ առաջնորդ Դևլեթ Բահչելին նշել է, որ ոչ ոք կուսակցության ներսում չի կարող իրեն բարձր դասել կուսակցական կանոնադրությունից և օրենքներից: Լրագրողներից մեկի այն հարցին, թե արդյոք Թուրքեշի հեռանալը կնպաստի կուսակցության ձայների նվազմանն առաջիկա ընտրություններում, Բահչելին ասել էր. «Մի սարի վրա եթե ճնճղուկ դրվի, սարն ի՞նչ կշահի: Եթե մի սարի վրայից ճնճղուկին հանեն, սարն ի՞նչ կկորցնի: Չգիտեմ, կարողացա՞ արդյոք բացատրել»:
Բաժանորդագրվեք մեր ալիքին Telegram-ում