ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: «Բոկո Հարամ»-ի զինյալների կատարած բռնությունների պատճառով Նիգերիայի հյուսիսարեւելյան մասում շուրջ 2,1 մլն մարդ հարկադրված են եղել լքել իրենց տները: Այդ մասին, ինչպես տեղեկացնում Է «Արմենպրես»-ը, սեպտեմբերի 4-ին հայտարարել են Միգրացիայի միջազգային կազմակերպությունում (ՄՄԿ):

Ավելի վաղ կազմակերպությունը հայտնել Էր, որ շուրջ 1,4 մլն բնակիչներ հարկադրված են եղել հեռանալ իրենց տներից Նիգերիայի հյուսիսարեւելյան շրջանում, որտեղ «Բոկո Հարամ»-ը հատկապես ակտիվ Է:

«Ներկայում 2,1 միլիոնից ավելի մարդ հարկադիր վերաբնակներ են եւ ներկայացնում են Նիգերիայի հյուսիսային շրջանների ավելի քան 300 հազար ընտանիքներ»,-ասված Է ՄՄԿ-ի հայտարարության մեջ:

Նիգերիայում ակտիվորեն գործում Է «Բոկո Հարամ» արմատական իսլամիստական խմբավորումը, որի անդամները հանդես են գալիս կրթության արեւմտյան մոդելի դեմ եւ ձգտում են ամբողջ երկրում հասնել շարիաթի նորմերի հաստատման: Երկրում պարբերաբար կատարվող ահաբեկչական գործողությունների մեծամասնությունը խմբավորման զինյալների ձեռքի գործն Է, հաղորդել Է ՌԻԱ Նովոստին:

Լուսանկարը` AFP