Եվրոպան ոչ թե միգրանտների ներհոսքի, այլ փախստականների հետ կապված ճգնաժամ Է ապրում. ՄԱԿ
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Ներկայում Եվրոպան ոչ թե միգրանտների ներհոսքի, այլ, ամենից առաջ, փախստականների հետ կապված ճգնաժամ Է ապրում: Այս մասին, ինչպես տեղեկացնում Է «Արմենպրես»-ը, հայտարարել Է ՄԱԿ-ի Փախստականների գործերի գերագույն կոմիսար Անտոնիու Գուտերեշը, որը հիմնախնդրի լուծման «համատեղ կենտրոնացված ջանքերի» կոչ Է արել:
«Դա առաջին հերթին փախստականների ճգնաժամ Է, այլ ոչ թե միգրացիայի ֆենոմեն,- ասել Է Գուտերեշը Ժնեում տարածված հայտարարության մեջ:- Հունաստան ժամանողների մեծ մասը հակամարտությունների գոտիներից, այդ թվում՝ Սիրիայից, Իրաքից կամ Աֆղանստանից եկած մարդիկ են, եւ նրանք փախչում են այնտեղից՝ փրկելով իրենց կյանքը»:
Գերագույն կոմիսարի խոսքով՝ «Եվրոպան անհաջողություն Է կրել» ճգնաժամին «համատեղ պատասխան գտնելու հարցում, եւ դա հանգեցրել Է «մարդկանց տառապանքների»: Ավելի քան 2,6 հազար մարդ Է զոհվել Միջերկրական ծովով Հին աշխարհ հասնելու փորձ անելիս: իսկ նրանք, ում հաջողվել Է հասնել Եվրոպայի ափեր, «քաոսի, նվաստացման եւ վտանգների» են ենթարկվում «պետությունների սահմաններին ու ճանապարհին», նշել Է նա:
«Այս իրադրությունը պահանջում Է համատեղ կենտրոնացված ջանքեր, ինչն անհնարին Է ներկայիս հատվածական մոտեցման դեպքում»,- հավելել Է Գուտերեշը, հաղորդել Է ՏԱՍՍ-ը:
Լուսանկարը`Reuters
Բաժանորդագրվեք մեր ալիքին Telegram-ում