ԲԵՌԼԻՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Գերմանիայի արտաքին գործերի նախարար Ֆրանկ-Վալտեր Շտայնմայերը քննադատության է ենթարկել Հունգարիայի վարչապետ Վիկտոր Օրբանին, ով ավելի վաղ փախստականների խնդիրն անվանել էր ոչ թե եվրոպական, այլ միայն «գերմանական խնդիր»: «Դա ամբողջական անհեթեթություն է»,- գերմանական DPA գործակալությանն ասել է Շտայնմայերը: Նա հանդես է եկել  «փոխադարձ մեղադրանքներ»-ը դադարեցնելու օգտին և կոչ արել միմյանց տեղեկացնելով  առաջ շարժվել ճգնաժամի հաղթահարման համար: «Ես համագործակցություն եմ սպասում Եվրոպական միության բոլոր 28 անդամ-երկրների կողմից»,- «Արմենպրես»-ի փոխանցմամբ` հայտարարել է նախարարը:

  Ավելի վաղ Օրբանի խոսքերին անհամաձայնություն էր հայտնել Գերմանիայի կանցլեր Անգելա Մերկելը: «Դա (փախստականների խնդիրը) Եվրոպայում վերաբերում է բոլորիս»,- Շվեյցարիայի նախագահ Սիմմոնետտ Սիմմարոտտոյի հետ համատեղ ասուլիսում հայտարարել է Մերկելը:

  Օրբանը, ում կարծիքը քննադատության է ենթարկվել Գերմանիայում, իր խոսքերը պայմանավորել է նրանով, որ հազարավոր ժամանողները ցանկանում են առաջին հերթին հայտնվել Գերմանիայում, այլ ոչ թե «Հունգարիայում, Սլովակիայում կամ Լատվիայում»:

   Եվրահանձնաժողովի նախագահ Ժան-Կլոդ Յունկերի հետ բանակցությունների ժամանակ Օրբանը հայտարարել է, որ սեպտեմբերի 15-ին Հունգարիան իր բանակը կուղղի փախստականներից սահմանների պաշտպանությանը: