Հենաշարժողական խնդիրներ ունեցող 100 երեխաներ մասնակցել են ամառային ճամբարների ծրագրին
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի քաղաքապետարանը Հայաստանի հաշմանդամների «Փյունիկ» միության հետ համատեղ արդեն երրորդ տարին անընդմեջ «Երևանյան ամառ» եռամսյա ծրագրի շրջանակում հենաշարժողական խնդիրներ ունեցող երեխաների համար կազմակերպում է ամառային ճամբարներ: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, օգոստոսի 28-ին մեկնարկած քառօրյա ծրագիրն ավարտվել է:
Խաղերով ու անակնկալներով լի առօրյայով ճամբարներում այս տարի իրենց հանգիստն են անցկացրել շուրջ 100 փոքրիկներ և պատանիներ: Երեխաներն այցելել են Մանկական երկաթուղի, անվճար օգտվել նաև «Հաղթանակ» զբոսայգու ատրակցիոններից, Երևանի կենդանաբանական այգում հետևել են կենդանիների կերակրման ընթացքին, մեկ օր էլ անցկացրել են Հայաստանի հաշմանդամների «Փյունիկ» միությունում:
Սոցիալական կարևոր նշանակություն ունեցող այս ծրագիրը լինելու է շարունակական նաև առաջիկա տարիներին: Երևանի քաղաքապետ Տարոն Մարգարյանի հանձնարարությամբ ծրագրում ընդգրկվում են ցանկություն հայտնած հենաշարժողական խնդիրներ ունեցող բոլոր երեխաները:
Բաժանորդագրվեք մեր ալիքին Telegram-ում