Վենետիկի կինոփառատոնն սկսվում է «Էվերեստի» նվաճմամբ
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Վենետիկի կինոփառատոնը՝ թվով 72-րդը, սեպտեմբերի 2-ին Լիդո կղզում իր աշխատանքն սկսում է Բալտասար Կորմակուրի «Էվերեստ» ֆիլմի պրեմիերայով, տեղեկացնում է «Արմենպրես»-ը:
Այս տարվա հիմնական մրցույթում հայտարարված է 21 կինոնկար: Ստուգատեսը բացող «Էվերեստ» դրաման հիմնված է իրական իրադարձությունների վրա: Կինոնկարը պատմում է աշխարհի ամենաբարձր գագաթը նվաճած երկու արշավախմբերի մասին: Մրցույթին ներկայացված հայտնի կինեմատոգրաֆիստների նոր աշխատանքների թվում Է իտալացի ռեժիսոր Մարկո Բելոկիոյի «Իմ արյան արյունը» պատմական դրաման՝ Ալբա Ռորվահերի մասնակցությամբ, որն անցյալ տարի ստացել է դերասանական Վոլպիի գավաթը: Բելոկիոյի «Քնած գեղեցկուհին» նախորդ ժապավենը Վենետիկում ներկայացվել էր 2012 թվականին:
Ներկայիս ստուգատեսի պրեմիերաներից մեկը կդառնա «Օսկար» մրցանակի դափնեկիր Թոմ Հուփերի «Աղջիկը Դանիայից» ժապավենը, որը հիմնված է Դեւիդ Էբերսհոֆի համանուն բեսթսելլերի վրա: Կինոնկարը պատմում է դանիացի նկարչուհի Հերդա Վեգեների եւ նրա ամուսնու՝ մոդել Էյների փոխհարաբերությունների մասին, որին սեռափոխության աշխարհում առաջին վիրահատությունն են կատարել: Հերդայի դերը խաղացել է ճանաչված երիտասարդ դերասանուհի Ալիսիա Վիկանդերը, իսկ Էյներ Վեգեների դերը՝ Էդդի Ռեդմեյնը, որը «Օսկար» մրցանակի է արժանացել «Սթիվեն Հոքինգի տիեզերքը» ֆիլմում խաղացած գլխավոր դերի համար:
Այս տարի գլխավոր մրցույթի ժյուրին գլխավորում է «Օսկար» մրցանակի դափնեկիր Ալֆոնսո Կուարոնը:
Զուգահեռ անցկացվող «Հորիզոններ» մրցութային ծրագրում ներկայացված կլինի 18 լիամետրաժ եւ 14 կարճամետրաժ կինոնկար: Այդ մրցույթի ժյուրին կգլխավորի «Գառների լռությունը» ֆիլմի ռեժիսոր Ջոնաթան Դեմեն, որը նաեւ կստանա սոտւգատեսի պատվավոր պարգեւներից մեկը, հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում