ԵԱՀԿ-ն 380 դիտորդ կուղարկի Ադրբեջան խորհրդարանական ընտրություններին հետեւելու համար
ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: ԵԱՀԿ ժողովրդավարական հետազոտությունների մարդու իրավունքների գրասենյակը (ԺՀՄԻԳ) 380 հոգուց բաղկացած դիտորդական առաքելություն կուղարկի Ադրբեջան նոյեմբերի 1-ին անցկացվելիք հերթական խորհրդարանական ընտրություններին հետեւելու համար:
Այս մասին, ինչպես հաղորդում է «Արմենպրես»-ը, հայտնում է ԵԱՀԿ կայքը:
Ենթադրվում է, որ առաքելության կազմում կընդգրկվեն 30 երկարաժամկետ եւ 350 կարճաժամկետ դիտորդներ:
Ավելի վաղ ԵԱՀԿ ԺՀՄԻԳ-ը հետեւել է Ադրբեջանում անցկացված 9 ընտրություններին: Վերջին անգամ կազմակերպությունը դիտողություններ եւ հանձնարականներ է առաջադրել Ադրբեջանում 2013 թվականին անցկացված նախագահական ընտրություններից հետո, սակայն, ադրբեջանական իշխանություններն արհամարհել են դրանք, ավելին, 2015 թվականի հուլիսի 4-ին փակվել է Բաքվում ԵԱՀԿ նախագծերի համակարգողների գրասենյակը:
ԵԱՀԿ ԺՀՄԻԳ-ը պարբերաբար քննադատում է Ադրբեջանին թափանցիկ ընտրություններ չանցկացվելու, ընտրողների քվեների հաշվարկման ժամանակ կեղծիքներ թույլ տալու համար:
Բաժանորդագրվեք մեր ալիքին Telegram-ում