ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Մալազիական Մալակկա քաղաքի իշխանությունները ձերբակալել են 12 քաղաքացու, ովքեր մասնակցում են մայրաքաղաքում անցկացվող հակաիշխանական չարտոնված հանրահավաքին: «Արմենպրես»-ի հաղորդմամբ` ինչպես տեղեկացնում է ՏԱՍՍ-ը, քաղաքային ոստիկանության ղեկավարի խոսքերով, բոլոր 12 քաղաքացիները կրել են «Bersih 4» գրառումներով դեղին վերնաշապիկներ, ինչը ներկայիս ցույցերի խորհրդանիշն է համարվում: Նրա խոսքերով, ձերբակալվածների մի մասը փորձել է փակել բանուկ ճանապարհները, ինչպես նաև դիմադրություն է ցուցաբերել ոստիկանության աշխատակիցներին:

Բացի այդ, Մալազիայի փոխվարչապետ, ներքին գործերի նախարար Ահմադ Զահիդ Համիդին ցուցարարներին նախազգուշացրել է հնարավոր խիստ պատիժների կիրառման մասին, եթե նրանք խախտեն օրենքը: «Անկասկասծ, նրանք պատասխանատվության կենթարկվեն, եթե խախտեն օրենքները: Եվ ամենևին էլ պետք չէ իշխանություններին մեղադրել դաժանության մեջ, երբ նրանց նկատմամբ համապատասխան քայլեր կձեռնարկվեն»,-ասել է նա: Համիդիի խոսքերով, «ոստիկանությունն ուշի ուշով հետևում է տեղի ունեցող իրադարձություններին և ելույթներին, որոնք հնչում են հանրահավաքի ժամանակ: