Քաղաքաշինության նախարարությունը պատրաստում է հայ ճարտարապետների կառուցած շենքերի վերաբերյալ ընդհանուր տեղեկանքը
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: ՀՀ քաղաքաշինության նախարար Նարեկ Սարգսյանի հանձնարարականով՝ նախարարության ենթակայության տակ գործող Ճարտարապետության ազգային և Ալեքսանդր Թամանյանի թանգարան-ինստիտուտների տնօրեններին՝ պատրաստել հանրապետության մարզերում հայ ճարտարապետների հեղինակած արժեքավոր և ուշագրավ շենքերի վերաբերյալ տեղեկանք, որը կներառեր շենքերի հեղինակների անունները և կառուցման տարեթվերը՝ այդ շենքերի վրա նրանց անունները փորագրելու համար:
Ինչպես «Արմենպրես»-ին փոխանցեցին ՀՀ քաղաքաշինության նախարարության տեղեկատվության եւ հասարակայնության հետ կապերի վարչությունից, Ալեքսանդր Թամանյանի թանգարան-ինստիտուտի տնօրեն Հայկ Թամանյանի ներկայացրած տեղեկանքի համատեքստում՝ ճարտարապետներ Գևորգ Թամանյանի և Էդմոն Տիգրանյանի՝ 1950-60-ականներին Ջերմուկ առողջարանային քաղաքում կառուցված չորս հիշարժան շենքերի (Գ. Թամանյանի նախագծած «Ըմպելասրահ»-ը, նախկինում՝ առողջարանային համալիրներ, այսօր՝ «Արմենիա» և «Օլիմպիա» հյուրանոցները, Էդ. Տիգրանյանի հեղինակած առողջարանի շենքը, ներկայում՝ «Թուրիս» հյուրանոց) վերաբերյալ աշխատանքային խումբը ներկայացրել է համապատասխան առաջարկներ:
Այժմ նախարարությունում ձևավորում են արձանագրությունների շաբլոնները, որոնք առաջիկայում կպատվիրվեն:
Վերը նշված հուշարձան շենքերի վրա անհրաժեշտ տեղեկատվական- ճանաչողական արձանագրությունները կփորագրվեն հոկտեմբեր-նոյեմբեր ամիսներին:
Բաժանորդագրվեք մեր ալիքին Telegram-ում