Առաջատար մասնագետները քննարկել են Հայաստանում ճառագայթային բժշկության զարգացման հեռանկարները
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Հաշվի առնելով ճառագայթային բուժման արդյունավետությունը և տարեցտարի ավելացող ուռուցքաբանական հիվանդների աճը՝ առաջատար մասնագետների մասնակցությամբ քննարկվել են հանրապետությունում ճառագայթային բուժման առկա հզորությունները և առաջիկա տարիներին բուժման տեսակի պահանջարկը: Ինչպես «Արմենպրես»-ին տեղեկացրին ՀՀ առողջապահության նախարարությունից, ճառագայթաբանները ՀՀ առողջապահության նախարար Արմեն Մուրադյանին են ներկայացրել ոլորտի զարգացմանն ուղղված առաջարկություններ:
Նշվել է, որ նորագոյացությունների արդունավետ բուժումը և կառավարման ժամանակակից կարողությունների ստեղծումը ՀՀ առողջապահության նախարարության կարևոր և հրատապ լուծում պահանջող խնդիրներից է: Կարևորելով քաղցկեղի բուժման ծախսարդյունավետ մեթոդների ներդրումը,ինչպես նաև բուժման կարողությունների ընդլայնումը՝ քննարկվել է Ճառագայթային բուժման կենտրոն ունենալու հնարավորությունը: Բուժման այս տեսակի ընդլայնումը հնարավորություն կընձեռի ապահովել հասանելիություն, մատչելիություն, որակ, ինչպես նաև բարելավել առողջապահական ցուցանիշները:
Քննարկմանը մասնակցել են ՀՀ առողջապահության նախարարի տեղակալ Գագիկ Միրիջանյանը և ՀՀ ԱՆ Առողջապահական ԾԻԳ պետական հիմնարկի տնօրեն Նելսոն Զուլոյանը:
Բաժանորդագրվեք մեր ալիքին Telegram-ում