Հայաստանի եզդիները հիշատակել են Իրաքում իրենց հայրենակիցների դեմ իրականացված ցեղասպանության մեկ տարին
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Հյուսիսային Իրաքի Շանգալի տարածաշրջանում եզդի ժողովրդի նկատմամբ կատարված ցեղասպանությունից մեկ տարի անց մասնակի ազատագրված տարածքներ այսօր վերադարձել է մոտ 300 հազար եզդի: Հյուսիսային Իրաքի քրդական ինքնավարությունում եզդի ժողովրդի նկատմամբ մեկ տարի առաջ ԻԼԻՊ-ի ահաբեկիչների կողմից իրականացրած ցեղասպանության տարելիցի առնչությամբ օգոստոսի 3-ին կազմակերպված միջոցառմանն այս մասին լրագրողներին ասաց «Միդիա-Շանգալ» ՀԿ-ի նախագահ Ամո Շարոյանը:
«Մեր հայրենակիցների մի մասը վերադարձել է իրենց տները, սակայն, դժբախտաբար, անվտանգությունը դեռ ապահովված չէ, որ մնացածը նույնպես կարողանան վերադառնալ: Այդ իսկ պատճառով կոչ ենք անում միջազգային հանրությանն օգնել ստեղծելու եզդիների ինքնավար հանրապետությունը: Շանգալը եզդիների համար սովորական աշխարհաքաղաքական վայր չի: Այն մեր բնօրրան է, մեր օջախն ու տունը, որտեղ մեր ժողովուրդն արարել է և ստեղծել իր մշակույթը», - «Արմենպրես»-ի փոխանցմամբ՝ ասաց Ամո Շարոյանը:
«Միդիա-Շանգալ» ՀԿ-ի նախագահ Ամո Շարոյանը հիշեցրեց, որ Հայաստանի Հանրապետությունն առաջին իսկ օրվանից պատրաստակամություն է հայտնել սատարել ցեղասպանության ենթարկված եզդիներին, սակայն եզդիների առաջնային նպատակն է ամեն գնով շարունակել մնալ իրենց հայրենի հողում: Արդյունքում ներկա պահին Հայաստանում փախստականի կարգավիճակ ստանալու համար դիմել են 19 հոգուց բաղկացած եզդիների երեք ընտանիք:
Բաժանորդագրվեք մեր ալիքին Telegram-ում