ԳԱՎԱՌ, 31 ՀՈՒԼԻՍԻ, ԱՐՄԵՆՊՐԵՍ :  ՀՀ բնապահպանության նախարարության «Բնապահպանական ծրագրերի իրականացման գրասենյակ»-ը Գեղարքունիքի մարզի պետական կառավարման  ոլորտի ներկայացուցիչներին եւ հասարակական կազմակերպություններին ներկայացրեց Գեղարքունիքի մարզում «Գլոբալ էկոլոգիական հիմնադրամի» կողմից իրականացվող բնապահպանական  ծրագրերի ընթացքը  եւ «Գլոբալ էկոլոգիական հիմնադրամ-6» դրամաշնորհային ծրագրի ռազմավարությունը: «Արմենպրես»-ի տեղեկացմամբ` Գեղարքունիքի մարզում «Գլոբալ էկոլոգիական հիմնադրամ-5» դրամաշնորհային ծրագրերի ընթացքը ներկայացրեց ՀՀ բնապահպանության նախարարության «Բնապահպանական ծրագրերի իրականացման  գրասենյակ» պետական հիմնարկի կրթական ծրագրերի բաժնի պետ Ռուբիկ Շահազիզյանը: Ըստ զեկուցողի` «Գլոբալ էկոլոգիական հիմնադրամ-5» դրամաշնորհային ծրագրերի շրջանակներում մարզում իրականացվել կամ իրականացման ընթացքի մեջ են 6 բնապահպանական  ծրագրեր, որոնք վերաբերում են մեղվաբուծության, ձկնաբուծության, այգեգործության, դեգրադացված անտառային տարածների վերականգնման, արոտների կայուն օգտագործման, հասարակական լողափի ստեղծման ոլորտներին: «Գլոբալ էկոլոգիական հիմնադրամ-6» դրամաշնորհային ծրագրի ռազմավարությունը ներկայացրեց ՀՀ բնապահպանության նախարարության «Բնապահպանական ծրագրերի իրականացման գրասենյակ» պետական հիմնարկի տնօրենի տեղակալ Սամվել Բալոյանը: Նա առաջարկեց հասարակական կազմակերպություններին ու անհատ անձանց` մեկ շաբաթվա ընթացքում ՀՀ բնապահպանության նախարարության «Բնապահպանական ծրագրերի իրականացման գրասենյակ» ներկայացնել դրամաշնորհային ծրագրերի ռազմավարության վերաբերյալ առաջարկություններ, ինչպես նաեւ` մասնակցության հայտեր: «Ձեզ բաժանված են ծրագրի ռազմավարության մասին պատմող ուղեցույցերը: Դուք կարող եք առաջարկությունների հետ մեկտեղ ներակայցնել նաեւ գլոբալ նշանակության  ծրագրերի մասնակցության հայտեր: Ձեր առաջարկությունները կներկայացվեն  «Գլոբալ էկոլոգիական հիմնադրամ»-ի տնօրինության ուշադրությանը: Դրամաշնորհները ոչ քիչ գումարներ են կազմում, որոնք նպատակային օգտագործելու դեպքում բնապահպանական բազմապիսի հարցեր միասին կկարողանանք լուծել»,-նշեց Սամվել Բալոյանը:

 Խոսրով Խլղաթյան