Նորք-Մարաշի և Ստեփանակերտի քաղաքապետարանի աշխատակազմերի միջև փորձի փոխանակում կկատարվի
ԵՐԵՎԱՆ, 30 ՀՈւԼԻՍԻ, ԱՐՄԵՆՊՐԵՍ: Երևանի և Ստեփանակերտի միջև բարեկամության համաձայնագրի շրջանակում երկկողմ համագործակցությանն առնչվող հարցերի քննարկման նպատակով ԼՂՀ Ստեփանակերտի փոխքաղաքապետ Սուրեն Թամրազյանն այցելել է Երևանի Նորք-Մարաշ վարչական շրջան: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, վարչական շրջանի աշխատակազմում տեղի ունեցած հանդիպման ընթացքում վարչական շրջանի ղեկավար Վարազդատ Մկրտչյանը և Ստեփանակերտի փոխքաղաքապետ Սուրեն Թամրազյանը պայմանավորվածություն են ձեռք բերել 2014 թվականից մեկնարկած համագործակցության ծրագրի շարունակության վերաբերյալ:
Երևանի քաղաքապետ Տարոն Մարգարյանի և Ստեփանակերտի քաղաքապետ Սուրեն Գևորգյանի միջև ձեռբերված փոխշահավետ համաձայնության համատեքստում վարչական շրջանի և Ստեփանակերտի համագործակցության հետագա ծրագրերում ներառվել են Նորք-Մարաշի և Ստեփանակերտի քաղաքապետարանի աշխատակազմերի միջև փորձի փոխանակումը և համագործակցությունը կրթության, մշակույթի, սպորտի և սոցիալական ապահովության ոլորտներում: Նաև փոխադարձ պայմանավորվածություն է ձեռք բերվել օգոստոսին կազմակերպել Նորք-Մարաշ վարչական շրջանի աշխատակազմի պատվիրակության այցը Ստեփանակերտ:
Բաժանորդագրվեք մեր ալիքին Telegram-ում