Գեղարքունիքի մարզպետը դիտարկեց հանրակրթական դպրոցներում ընթացող հիմնանորոգման աշխատանքները
ԳԱՎԱՌ, 29 ՀՈՒԼԻՍԻ, ԱՐՄԵՆՊՐԵՍ : Գեղարքունիքի մարզի 21 հանրակրթական հաստատություններում տնտեսված միջոցների հաշվին ընթանում են հիմնանորոգման աշխատանքներ: Դրանք իրականացնող շինարարական կազմակերպությունների ղեկավարների հետ հանդիպում- քննարկում անցկացրեց Գեղարքունիքի մարզպետ Ռաֆիկ Գրիգորյանը:
Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի տեղեկատվության եւ հասարակայնության հետ կապերի բաժնից, շինարարական կազմակերպությունների ղեկավարները մարզպետին տեղեկատվություն ներկայացրին իրենց կողմից դպրոցներում ըստ նախագծանախահաշվային փաստաթղթի իրականացվող աշխատանքների վերաբերյալ, անդրադարձան այդ ընթացքում ի հայտ եկած խնդիրներին: Ռաֆիկ Գրիգորյանը շինարարներին հորդորեց աշխատանքները կատարել որակով եւ առանց թերացումների:
«Մարզպետարանի համապատասխան հանձնաժողովը մանրակրկիտ ուսումնասիրություն կանցկացնի հիմնանորոգվող դպրոցներում: Հետագա խնդիրներից զերծ մնալու համար առաջարկում եմ աշխատանքները կատարել որակով, բարեխղճորեն, առանց թերացումների»,-նշեց մարզպետը:
Հանդիպման ավարտից հետո մարզպետն այցելեց Կարմիրգյուղի թիվ 2, Լանջաղբյուրի, Գավառի թիվ 1 եւ թիվ 7 միջնակարգ դպրոցներ, որտեղ տնտեսված միջոցների հաշվին իրականացվում են աշխատանքներ, տեղում ծանոթացավ շինարարության ընթացքին եւ կատարվող աշխատանքների որակին: Ռաֆիկ Գրիգորյանը հանձնարարեց շինարարներին վերացնել աշխատանքներում տեղ գտած թերությունները եւ մինչեւ նոր ուսումնական տարվա սկիզբն ավարտել բոլոր տեսակի աշխատանքները :
Խոսրով Խլղաթյան
Բաժանորդագրվեք մեր ալիքին Telegram-ում