Կարմիր բլուր հնավայրին կից այգու բարեկարգումը կավարտվի հոկտեմբերին
ԵՐԵՎԱՆ, 28 ՀՈւԼԻՍԻ, ԱՐՄԵՆՊՐԵՍ: Մայրաքաղաքի կանաչ գոտիների, պուրակների և այգիների տարածքների ընդլայնման, նորերի ձևավորման ծրագրի համատեքստում Շենգավիթ վարչական շրջանում շարունակվում են Կարմիր բլուր հնավայրին հարակից տարածքի բարեկարգման աշխատանքները: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, համաքաղաքային գարնանային ծառատունկի աշխատանքների ընթացքում մաքրվել և փորվել է այգու տարածքը, ավելացվել է անհրաժեշտ քանակությամբ բուսահող:
Ներկայում ընթացքի մեջ է և շուտով կավարտվի բարեկարգման աշխատանքների առաջին փուլը: Զուգահեռաբար նախանշվել են ապագա զբոսայգու ճեմուղիները, սիզամարգային հատվածները: Առաջիկա ամիսներին կձևավորվեն նաև հանգստի գոտիները, խաղահրապարակները, այգին կկահավորվի և կներկայանա հարմարավետ ու գեղեցիկ տեսքով: Շուրջ 3000 քմ տարածքով այգին նախատեսվում է երևանցիներին հանձնել հոկտեմբերին:
Բաժանորդագրվեք մեր ալիքին Telegram-ում