Արամ Ա-ն ուսանողների հետ քննարկել է միջկեղեցական շարժման կարևորությունը
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Բիքֆայայի Ս. Աստվածածին եկեղեցում Ն.Ս.Օ.Տ.Տ. Արամ Ա կաթողիկոսին այցելել են միջկեղեցական ու աստվածաբանական կազմավորմանը մասնակցող ավելի քան 50 համալսարանականներ: Խմբի կազմում ընդգրկվել են Լիբանանի, Եգիպտոսի, Սուդանի, Մարոկոյի և եվրոպական երկրների համալսարաններում աստվածաբանական դասընթացներին հետևող ուսանողներ, որոնք եկել էին Լիբանան միջեկեղեցական շարժման պատմությանն ու դրան առնչվող ծրագրերին և առաջնահերթություններին ավելի մոտիկից ծանոթանալու համար: Այս մասին «Արմենպրես»-ը տեղեկացավ Կիլիկիո կաթողիկոսության պաշտոնական կայքից:
Ողջունելով ուսանողներին՝ Վեհափառ Հայրապետը գնահատել է այս նախաձեռնությունը՝ շեշտելով միջեկեղեցական շարժման կարևորությունը: Նա անդրադարձել է մի քանի կետերի՝ նշելով, որ միջեկեղեցական շարժումը ներկա աշխարհի քրիստոնեական կյանքում հրամայական անհրաժեշտություն է:
Նրա խոսքով՝ միջեկեղեցական շարժման նպատակը եկեղեցու միության ու եկեղեցու առաքելության կենսավորումն է: Ապա կաթողիկոսը խոսել է միջեկեղեցական շարժման կարևորության մասին և ընդգծել, որ միջեկեղեցական շարժումն առաջնահերթ կարևորություն պետք է տա միջկրոնական երկխոսությանը ու գործակցությանը:
Դասախոսության ավարտին Վեհափառ Հայրապետը պատասխանել է միջեկեղեցական շարժման, Հայոց Ցեղասպանության 100-րդ տարելիցի և հայ եկեղեցու վերաբերյալ հարցերին:
Բաժանորդագրվեք մեր ալիքին Telegram-ում