ԵՐԵՎԱՆ, 27 ՀՈՒԼԻՍԻ, ԱՐՄԵՆՐԵՍ: Թուրքիան Հյուսիսատլանտյան համաձայնագրի 4-րդ հոդվածի շրջանակում ՆԱՏՕ-ի խորհրդի նիստ է հրավիրել,: Ինչպես հաղորդում է «Արմենպրես»-ը՝ վկայակոչելով թուրքական «Անադոլու» գործակալությունը, խորհուրդը կհավաքվի հուլիսի 28-ին:

Թուրքիայի արտաքին գործերի նախարարության պարզաբանման մեջ նշվել է, որ խորհրդի նիստ հրավիրելը նպատակ ունի ՆԱՏՕ-ի գործընկեր պետություններին տեղեկացնել Թուրքիայի ազգային անվտանգությանն ուղղված վերջին հարձակումների և սպառնալիքների առնչությամբ ահաբեկչության դեմ պայքարում ձեռնարկված միջոցների և իրականացված գործողությունների մասին, ինչպես նաև քննարկել ստեղծված իրադրությունն անդամ երկրների հետ:

Հուլիսի 28-ին նախատեսված արտահերթ նիստը կնախագահի ՆԱՏՕ-ի գլխավոր քարտուղար Յենս Ստոլտենբերգը: Վերջինս բրիտանական BBC-ի հետ զրույցում տեղին է համարել Թուրքիայի պահանջը ՆԱՏՕ-ի նիստ հրավիրելու վերաբերյալ:

Հյուսիսատլանտյան համաձայնագրի 4-րդ կետը նախատեսում է քննարկումներ անցկացնել դաշինքի անդամ երկրների հետ, եթե անդամներից մեկի տարածքային ամբողջականությունը, քաղաքական անկախությունն ու անվտանգությունը սպառնալիքի տակ են: