ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: «Իսլամական պետության» ահաբեկիչները վերահսկողություն են հաստատել Ռակկա քաղաքի հյուսիսում գտնվող Այն Այիսա գյուղաքաղաքի վրա: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, այս մասին տեղեկացնում է Մարդու իրավունքների պաշտպանության սիրիական մոնիթորինգի կենտրոնը: Գյուղաքաղաքը գտնվում էր քրդական ուժերի հսկողության տակ: Կենտրոնի տնօրեն Ռամի Աբդ Ռահմանի խոսքով՝ ԻՊ-ն գրավել է ոչ միայն գյուղաքաղաքը, այլև մերձակա շրջանները:

Գյուղաքաղաքը գտնվում է Հալեպից դեպի իրաքյան Մոսուլ քաղաք տանող ճանապարհին:

Հունիսի 23-ին քրդական ուժերը Ռակկայի նահանգում իրականացրած ռազմական գործողոթյունների արդյունքում ազատագրել էին Այն Այիսա և Թել Աբյադ գյուղաքաղաքները:

Ահաբեկիչները  նաև լուրջ վնասներ էին կրել միջազգային դաշինքի ռմբակոծություններից:

«Իսլամական պետություն» իսլամիստական ահաբեկչական կազմակերպությունը գործում է Սիրիայի և Իրաքի տարածքներում: 2013 թ. ապրիլին «Ալ Կաիդա»-ի երկու ճյուղերի միավորման արդյունքում ձևավորվել է խմբավորում՝ «Իրաքի և Լևանտի իսլամական պետություն» անվանումով, որի նպատակն էր կազմավորել իսլամական էմիրություն Լիբանանի, Սիրիայի և Իրաքի տարածքներում: 2014 թ. հունիսի 29-ին ԻԼԻՊ-ը Սիրիայի և Իրաքի գրաված տարածքներում հայտարարել է Իսլամական խալիֆաթ հիմնելու մասին, որի խալիֆ է նշանակվել Աբու Բաքր ալ Բաղդադին: Այնուհետև կազմակերպության անվանումը փոխելու որոշում է ընդունվել, և այն վերանվանվել է «Իսլամական պետություն»: Խմբավորման կազմում կռվում են 80 երկրի զինյսլներ: