Որոտանի ջրամբարում հայտնաբերվել է 21-ամյա ջրախեղդ
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ: Սյունիքի մարզային քննչական վարչությունում քննություն է իրականացվում՝ պարզելու համար 21-ամյա երիտասարդի մահվան բոլոր հանգամանքները։ Ինչպես «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից, 2015թ. հուլիսի 2-ին ահազանգ է ստացվել, որ նույն օրը, ժամը 16։00-ի սահմաններում, Որոտան գետի ջրամբարում լողանալիս խեղդվել է Սյունիքի մարզի 21-ամյա բնակիչ։
Նախնական տվյալներով՝ Սպանդարյան գյուղի բնակիչ, 1994թ. ծնված Ապետնակ Վաչագանի Պետրոսյանը երկու ընկերների հետ հուլիսի 2-ին, ժամը 15:00-ի սահմաններում, գնացել է Սյունիքի մարզի Սառնակունք գյուղի «Կալաջղ» կոչվող տարածք, միասին հաց կերել, օղի խմել։ Ժամը 16:00-ի սահմաններում Ապետնակ Պետրոսյանը մտել է նույն տարածքում գտնվող Որոտան գետի ջրամբարում լողանալու, որի ժամանակ խեղդվել է:
Կատարվել է դեպքի վայրի և դիակի արտաքին զննություն: Դիակի վրա բռնության հետքեր և մարմնական վնասվածքներ չեն հայտնաբերվել: Նշանակվել է դիակի դատաբժշկական փորձաքննություն՝ պարզելու մահվան պատճառը: Բացատրություններ են վերցվել Ա.Պետրոսյանի հետ միասին «Կալաջղ» կոչվող տարածք գնացած մյուս երիտասարդներից։
Հանձարարություն է տրվել ոստիկանության Սիսիանի բաժնին՝ միջոցներ ձեռնարկել հայտնաբերելու համար հնարավոր այլ ականատես վկաների, պարզելու համար դեպքի հանգամանքները։
Բաժանորդագրվեք մեր ալիքին Telegram-ում