Երևանի 37-ամյա բնակչի սպանության դեպքի առթիվ հարուցվել է քրեական գործ
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: ՀՀ քննչական կոմիտեի Երևան քաղաքի Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ 37-ամյա տղամարդու սպանության դեպքի առթիվ։
Ինչպես «Արմենպրես»-ին տեղեկացրին ՀՀ քննչական կոմիտեի տեղեկատվության և հասարակայնության հետ կապերի դեպարտամենտից, 2015 թվականի հունիսի 28-ին, ժամը 21:30-ին, Երևան քաղաքի «Մխիթար Հերացու անվան թիվ 1 համալսարանական հիվանդանոցից» հաղորդում է ստացվել, որ նույն օրը, ժամը 21:25-ին, շտապօգնության կողմից Երևան քաղաքի Քաջազնունի փողոցի 4-րդ շենքին հարող տարածքից բուժօգնության է տեղափոխվել ինքնությունը չպարզված, մոտ 35-40 տարեկան տղամարդ՝ ձախ աճուկային շրջանի կտրած-ծակած վերքով, ով հիվանդանոց տեղափոխելու ճանապարհին մահացել է:
Դեպքի առթիվ Երևան քաղաքի Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ` ՀՀ քրեական օրենսգրքի 104-րդ հոդվածի 1-ին մասով: Քննությամբ պարզվել է սպանվածի ինքնությունը, ով Երևանի բնակիչ, 1977թ. ծնված Արման Մելիքյանն է։
Ձեռնարկված միջոցառումների արդյունքում պարզվել են սպանության որոշ հանգամանքներ, կատարվում են անհրաժեշտ քննչական և դատավարական գործողություններ՝ դեպքի հանգամանքների բազմակողմանի և օբյեկտիվ հետազոտումն ապահովելու, առերևույթ հանցագործություն կատարած անձի ինքնությունը պարզելու ուղղությամբ։
Բաժանորդագրվեք մեր ալիքին Telegram-ում