ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Պորտուգալական ֆուտբոլի ներկայացուցիչ, «Ռեալ»-ի նախկին ֆուտբոլիստ Լուիշ Ֆիգուն, ով նաև առաջադրվել էր ՖԻՖԱ-ի նախագահի պաշտոնում, առաջարկել է ՖԻՖԱ-ի 5-րդ անգամ վերընտրված նախագահին` գործել բարխղճորեն և հրաժարվել պաշտոնից:

«Սա ֆուտբոլի համար ևս մեկ սև օր է: Առաջին հերթին պարտվեց ՖԻՖԱ-ն և պարտվեց հենց ֆուտբոլը և պարտվեցին նրանք, ովքեր հոգում են ֆուտբոլի մասին: Եթե Բլատերը գոնե մի քիչ անհանգստանար ֆուտբոլի մասին, ապա նա կհրաժարվեր վերընտրվելուց: Եթե նա գոնե մի քիչ բարեկիրթ լիներ, ապա կհրաժարվեր պաշտոնից»,-«Արմենպրես»-ի հաղորդմամբ, Ֆիգուի խոսքերը մեջ է բերում BBC-ն:

ՖԻՖԱ-ի 65-րդ կոնգրեսի ժամանակ ֆուտբոլի միջազգային ֆեդերացիայի նախագահ վերընտրվեց Ժոզեֆ Բլատերը: Վերջինս արդեն 5-րդ անգամ է ընտրվում այդ պաշտոնում: ՖԻՖԱ-ում լինելով դեռևս 1975 թվականից, Բլատերն առաջին անգամ ՖԻՖԱ-ի նախագահ դարձավ 1998 թվականին: Նախագահի պաշտոնի համար պայքարում էին երկու թեկնածու` գործող նախագահը` Ժոզեֆ Բլատերը և Հորդանանի արքայազն Ալ Հուսեյնը: Ընտրություների ընթացքում առաջին փուլի ժամանակ Բլատերը հավաքեց 133 ձայն, իսկ Հուսեյնը` 73. առկա էր երկրորդ փուլի հնարավորություն, սակայն Հուսեյնը հրաժարվեց հետագա պայքարից: