ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: Բելգիայի Հումանիստական ժողովրդավարական կենտրոն կուսակցության թուրք պատգամավոր Մահինուր Օզդեմիրը հեռացվել է կուսակցության շարքերից Հայոց ցեղասպանությունը չճանաչելու համար: Ինչպես հաղորդում է «Արմենպրես»-ը`վկայակոչելով Massispost.com-ը, այս մասին պատմել է անձամբ Օզդեմիրը: Հումանիստական ժողովրդավարական կենտրոն կուսակցության ղեկավար Բենոիթ Լութգենն ավելի վաղը հայտնել էր իրենց վճռականության մասին, որ Հայոց ցեղասպանությունը ժխտող ցանկացած մեկը կհեռացվի իրենց քաղաքական ուժի շարքերից: «Մեր կուսակցության մեջ ցանկացած ժխտողի առկայության պարագայում նա անմիջապես կհեռացվի մեր շարքերից»,- ասել է Լութգենը:

Մահինուր Օզդեմիրը, ով առաջինն է Բելգիայի խորհրդարան մուտք գործել գլխաշորով, բոյկոտել էր խորհրդարանում Հայոց ցեղասպանության զոհերի հիշատակի համար մեկ րոպե լռության պահը` հայտնելով, որ «Հայոց ցեղասպանության վերաբերյալ Եվրախորհրդարանի ընդունած բանաձևը պարտադիր չէ»: Հետագայում նա հրաժարվել էր նաև ստորագրել իր կուսակցության ղեկավար Լութգենի կողմից առաջարկված կոմյունիկեն, որը 1915 թվականի դեպքերը ճանաչում էր որպես ցեղասպանություն: