Վիեննայում բարձր են գնահատել հայկական կոնյակը
ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ: Վիեննայի «Kempinski» հյուրանոցի հանդիսությունների սրահում մայիսի 28-ին տեղի է ունեցել «Արարատ» կոնյակի համտեսի միջոցառում` կազմակերպված Ավստրիայում ՀՀ դեսպանության և «Արարատ» Երևանի կոնյակի գործարանի կողմից: Հանրապետության տոնին նվիրված միջոցառման կազմակերպչական և մասնագիտական շրջանների ներկայության ապահովման հարցերում հայկական կողմին իր օժանդակությունն է բերել Ավստրիայում «Պեռնո Ռիկար» ընկերության ներկայացուցչությունը:
Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, միջոցառմանը բացման խոսքով հանդես է եկել Ավստրիայում ՀՀ դեսպան Արման Կիրակոսյանը: Իր ելույթում դեսպանը նշել է, որ Հայաստանի Առաջին Հանրապետության հռչակումը 1918 թվականին հայ ժողովրդի պատմության կարևորագույն իրադարձություններից է, երբ բազմադարյա անկախության կորստից հետո վերականգնվել է ազգային պետականությունը: Նա նաև հույս է հայտնել, որ նման միջոցառումների կազմակերպումը խրախուսելու և նպաստելու է հայկական արտադրատեսականու արտահանմանն ու շուկաների ընդլայնմանը:
Ներկաներին ողջունել են «Արարատ» Երևանի կոնյակի գործարանի և «Պեռնո Ռիկար» ընկերության ներկայացուցիչները: Այնուհետև գործարանի աշխատակցուհին ներկայացրել է Հայաստանում կոնյակի արտադրության սկզբնավորման և զարգացման պատմությունը, ներկա արտադրատեսականին, ինչպես նաև արարողության մասնակիցներին ծանոթացրել է համտեսի մասնագիտական նրբություններին:
Միջոցառմանը ներկա էին Ավստրիայի կառավարության, մասնավորապես արտաքին գերատեսչության, առևտրատնտեսական շրջանակների ներկայացուցիչներ, Վիեննայում հավատարմագրված դիվանագիտական առաքելությունների ղեկավարներ, միջազգային կազմակերպությունների ղեկավարներ, մասնագետ գինեգործներ, խմիչքի արտադրության և վաճառքի կազմակերպման հարցերում մասնագիտացած ընկերությունների ղեկավար անդամներ, լրագրողներ:
Ներկաները բարձր են գնահատել հայկական կոնյակի համային և որակական հատկանիշները:
Բաժանորդագրվեք մեր ալիքին Telegram-ում