ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ: ՈՒԵՖԱ-ի նախագահ Միշել Պլատինին անձամբ խնդրել է ՖԻՖԱ-ի նախագահ Յոզեֆ Բլատերին հեռանալ ՖԻՖԱ-ից, բայց նա մերժել է:

Պլատինին և Բլատերը հանդիպել են Ցյուրիխում, երբ ֆրանսիացին առաջարկել է Բլատերին հեռանալ ՖԻՖԱ-ի նախագահի պաշտոնից, Բլատերը, մասնավորապես, ասել է. «Արդեն շատ ուշ է նահանջելու համար»: ՈՒԵՖԱ-ն չի պատրաստվում բոյկոտել ՖԻՖԱ-ի հերթական կոնգրեսը: «Արմենպրես»-ի հաղորդմամբ, այս մասին գրում է ՏԱՍՍ գործակալությունը:

Ավելի վաղ ԶԼՄ-ներում գրում էին, որ Ֆուտբոլի միջազգային ֆեդերացիայի` ՖԻՖԱ-ի նախագահի ընտրության օրը կարող է փոփոխվել: ՈՒԵՖԱ-ի գլխավոր քարտուղար Ջանի Ինֆանտինոն հայտարարել էր, որ հարկավոր է տեղափոխել ՖԻՖԱ-ի նախագահի ընտրության օրը` ՖԻՖԱ-ում կաշառակերության հետ կապված մեծ աղմուկի պատճառով: Սակայն այդ հարցում ոչ մի փոփոխություն չի եղել, և ընտրությունները կկայանան մայիսի 29-ին: ՖԻՖԱ-ի նախագահի ընտրություններին կմասնակցեն երկու թեկնածու՝ ՖԻՖԱ-ի գործող նախագահ 79-ամյա Բլատերը և Հորդանանի ֆուտբոլի ֆեդերացիայի ղեկավար Ալի բին ալ Հուսեյնը: 

Լուսանկարը` EPA