ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Հայաստանը շարունակում է զարգացնել բարեկամական հարաբերություները Վրաստանի հետ, ինչի վառ ապացույցն են բարձր մակարդակով հաճախակի հանդիպումները: Այս մասին Ազգային ժողովում ՀՀ 2014թ. պետական բյուջեի կատարման հաշվետվության քննարկման ժամանակ նշեց ՀՀ արտաքին գործերի նախարարի տեղակալ Կարեն Նազարյանը՝ պատասխանելով ԲՀԿ խմբակցության պատգամավոր Ստեփան Մարգարյանի հարցին: «Այդ հանդիպումերի ընթացքում վեր են հանվում ինչպես տարածաշրջանային խնդիրներ, այնպես էլ երկկողմ համագործակցության վերաբերյալ բազմաթիվ հարցեր: Մինչ օրս խնդիրներ ի հայտ չեն եղել, և, որքանով ես եմ տեղեկացված, օրակարգը բավականին հագեցած է, բարեկամանական թափանցիկ հարաներությունների շնորհիվ մենք կարողանում ենք վեր հանել և հարթել բոլոր տեսակի խնդիրները»,- «Արմենպրես»-ի հաղորդմամբ՝ ընդգծեց նա:

Անդրադառնալով Եվրոպական ընտանիքին ինտեգրվելու Վրաստանի ցանկությանը՝ Նազարյանն ընդգծեց, որ դա Վրաստանի որոշելիքն է, ինչից տարածաշրջանի երկրները միայն կարող են շահել: «Հույս ունեմ, որ ապագա բոլոր նախաձեռնությունները կլինեն ներդաշնակ ինչպես Հայաստան-Եվրամիություն, այնպես էլ Վրաստան-Եվրամիություն հարաբերությունների առումով, և մենք խնդիրների չենք բախվի»,- հավելեց փոխնախարարը:

Նա վստահեցրեց, որ տարբեր ինտեգրացիոն գործընթացներում ներգրավված լինելը Հայաստանի և Վրաստանի համար իրավակակն առումով որևէ խնդիր չի առաջացնում բարեկամական հարաբերությունները զարգացնելու հարցում: «Ես չեմ կարող պնդել, որ մենք Վրաստանի հետ հարաբերություններում խնդիրներ չունենք: Կան խնդիրներ, սակայն դրանք հարթվում են հենց թափանցիկ և բարեկամական հարաբերությունների շնորհիվ»,- ասաց Նազարյանը: