Գյուղնախարարը կարկտահարության հետևանքները կներկայացնի կառավարությանը
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: ՀՀ վարչապետ Հովիկ Աբրահամյանը հանձնարարեց ՀՀ գյուղատնտեսության նախարար Սերգո Կարապետյանին կառավարության նիստին ներկայացնել վերջին շրջանում տեղի ունեցած կարկտահարության դեպքերի հետևանքների մասին տեղեկանք:
Ինչպես փոխանցում է «Արմենպրես»-ը՝ վարչապետը մասնավորապես նշեց. «Կցանկանայի նաև, որ, պարոն Կարապետյան, կարկտահարության հետևանքների մասին տեղեկանք ներկայացնեք կառավարության հաջորդ նիստին»:
Բացի այդ, վարչապետը հանձնարարեց նաև ՀՀ գյուղատնտեսության և Տարածքային կառավարման ու արտակարգ իրավիճակների նախարարներին՝ միասին քննարկել և կառավարության հաջորդ նիստին զեկուցել, թե քանի հակակարկտային կայաններ են պետք՝ մեր երկիրը և ընդհանրապես գյուղատնտեսական վայրերը «փակելու» համար:
Նախորդ և անցնող շաբաթվա ընթացքում Արմավիրի և Արարատի մարզերում տեղացած կարկուտի հետևանքով մի քանի գյուղեր կրել են մեծ վնասներ:
Բաժանորդագրվեք մեր ալիքին Telegram-ում