Լեհական ԶԱՌ թատրոնը Սան Ֆրանցիսկոյում հանդես կգա «Արմինե, քույր» ներկայացմամբ
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: Լեհական ԶԱՌ թատրոնը Սան Ֆրանցիսկոյի արվեստի միջազգային փառատոնում հանդես կգա «Արմինե, քույր» ներկայացմամբ: Ինչպես մայիսի 27-ին հաղորդում է «Արմենպրես»-ը՝ վկայակոչելով SFWeekly պարբերականը, լեհական հայտնի Գրոտովսկի ինստիտուտի թատերախմբի ներկայացումն անդրադառնում է Հայոց ցեղասպանության թեմային:
Երգի, շարժման և փոխհարաբերությունների միջոցով ներկայացվող «Արմինե, քույր» ներկայացումը արտացոլում է աշխարհի լռությունը իր աչքի առաջ կատարված բնաջնջման նկատմամբ:
«Բեմի վրա ստեղծելով մեկ փոքր հասարակություն՝ մենք ականատես ենք դառնում մեր իրականության հետ կապ չունեցող մի ընթացքի, որը համամարդկային նշանակություն ունի: Սրանով մենք ցանկանում ենք նվազեցնել առկա անտարբերությունը Հայոց ցեղասպանության վերաբերյալ», - ասաց ԶԱՌ թատրոնի գեղարվեստական ղեկավար Յարոսլավ Ֆրեթը:
ԶԱՌ թատրոնի՝ Հայաստան և Վրաստան առաջին ճանապարհորդությունը տեղի ունեցավ 1999 թ.: Չորս տարի թատերախումբն ուսումնասիրում էր բազմաձայնությունը, սակայն այս ներկայացման համար իրենք սկսեցին խոր ուսումնասիրել հայկական մոնոդիկ ավանդույթները: Ի տարբերություն թատերախմբի այլ նախագծերի՝ «Արմինե, քույր» ներկայացման համար առաջին անգամ իրենց միացան այլ մարդիկ՝ ի դեմս Ստամբուլում ծնված, Փարիզի հայկական եկեղեցու մեներգիչ, Արամ Քերովփյանի և Հայաստանից, Իրանից և Թուրքիայից այլ երգիչների:
Բաժանորդագրվեք մեր ալիքին Telegram-ում