ԳԱՎԱՌ, 25 ՄԱՅԻՍԻ, ԱՐՄԵՆՊՐԵՍ: Գավառ քաղաքի Հացառատ թաղամասի թիվ 2 միջնակարգ դպրոցը կունանա նորակառույց շենք եւ կրթական ամենաարդիական պայմաններ: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի ճարտարապետաշինարարական բաժնի վարիչ Արմեն Զոհրաբյանը, նոր դպրոցական շենքը կկառուցվի Ասիական զարգացման բանկի վարկային միջոցներով` 2 միլիոն 970 հազար ԱՄՆ դոլարի ներդրմամբ: «Գավառի թիվ 2 միջնակարգ դպրոցն ընդգրկված է Ասիական զարգացման բանկի «Դպրոցների սեյսմիկ անվտանգության  բարելավման ներդրումային ծրագրում»: Գավառի թիվ 2 միջնակարգ դպրոցի ներկայիս շենքը, որը կառուցվել է 1966 թվականին,  964 աշակերտական տեղով, վթարային է եւ վերականգնման եւ ուժեղացման համար ոչ ենթակա: Նորակառույց դպրոցական շենքը, որը կբարձրանա դպրոցի մարզահրապարակի մի մասում, կշահագործվի 660 աշակերտական տեղով: Մեկ աշակերտի հաշվով դպրոց կառուցելու համար պետությունը ծախսելու է 4500 դոլարին համարժեք դրամ»,-նշեց բաժնի վարիչը: Դպրոցական նորակառույց շենքի նախագծման եւ շինարարական աշխատանքների ժամկետները կհստակեցվեն առաջիկայում:

Խոսրով Խլղաթյան