Վոլգոգրադում ադրբեջանցիների եւ ռուսների միջեւ զանգվածային ծեծկռտուք է տեղի ունեցել
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Անցած գիշեր Վոլգոգրադի մարզում զանգվածային ծեծկռտուք է տեղի ունեցել ադրբեջանցիների եւ ռուսների միջեւ:
Ինչպես հաղորդում է «Արմենպրես»-ը` վկայակոչելով «Կոմսոմոլսկայա պրավդա»-ն, 57-ամյա վոլգոգրադցին վերադարձել է տուն, սակայն, չի կարողացել իր «ԳԱԶել» ավտոմեքենան մտցնել ավտոտնակ: Դռների առաջ կանգնած է եղել մի ավտոմեքենա, որում երաժշտություն էին լսում ոչ հեռու բնակվող երկու ադրբեջանցիներ: Տեղացի բնակիչը խնդրել է հեռացնել ավտոմեքենան իր ավտոտնակի առջեւից, որպեսզի կարողանա այնտեղ կայանել «ԳԱԶելը»: Նրանց միջեւ վիճաբանություն եւ ծեծկռտոց է սկսվել: Ադրբեջանցիները ծեծել են «ԳԱԶելի» վարորդին: Նրան օգնության են հասել մի քանի տեղացիներ, որոնք աղմուկ էին լսել հարեւանի տան մոտ: Իսկ ադրբեջանցիները կանչել են իրենց համերկրացի ծանոթներին: Ինչ-որ մեկը հրդեհել է մոտակայքում կայանած «ԿամԱԶ» բեռնատարը: Ծեծկռտոցի ժամանակ տուժել է տեղի մի թոշակառու եւս: Տուժածները վնասվածքներով տեղափոխվել են հիվանդանոց: Ոստիկանները 4 ադրբեջանցիների բերման են ենթարկել բաժանմունք: Միջադեպի առնչությամբ «խուլիգանություն» հոդվածով քրեական գործ է հարուցվել:
Վոլգոգրադի մարզպետ Անդրեյ Բոչարովը մարզի ՆԳՆ վարչության պետ Ալեքսանդր Կրավչենկոյին հանձնարարել է հետաքննել եւ պատժել միջադեպի մեղավորներին, որպեսզի միջադեպը չվերածվի ազգամիջյան բախման:
Բաժանորդագրվեք մեր ալիքին Telegram-ում