ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Իրաքցի վանական Նաջեբ Միքայելը, վտանգի ենթարկելով սեփական կյանքը, «Իրաքի և Լևանտի իսլամական պետություն» իսլամիստական կազմակերպության զինյալների ձեռքից փրկել է հարյուրավոր հնագույն ձեռագրեր, որոնց թվում եղել են նաև հայերեն բնագրեր: Ինչպես հաղորդում է «Արմենպրես»-ը, այս մասին տեղեկացնում է լիբանանյան The Daily Stary պարբերականը: «Անհրաժեշտ էր, որ այս ձեռագրերը խուսափեին ոչ մուսուլմանական մշակութային ժառանգության սիստեմատիկ ոչնչացումից»,- նշել է Միքայելը` անդրադառնալով ձեռագրերը փրկելու իր վերջին նախաձեռնությանը, որը հաջորդել էր 2008 թվականին դրանք Մոսուլից Քարաքոշ տեղափոխելու քայլին:

Վեց արկղերի միջոցով վանականի փրկած ձեռագրերի մեջ պատմական և փիլիսոփայական տեքստեր են,  քրիստոնեական և իսլամական փաստաթղթեր, երաժշտություն և գրականություն` գրված արամեերեն, ասորերեն, արաբերեն և հայերեն: Փրկված ձեռագրերի մի քանիսի պատճենները տեղափոխվել են Փարիզի Ազգային արխիվ, որտեղ կներկայացվեն «Միջագետք. մշակույթների խաչմերուկ» ցուցադրության ժամանակ: