Շիրակի մարզպետը շնորհավորել է մարզի շրջանավարտներին
ԳՅՈՒՄՐԻ, 22 ՄԱՅԻՍԻ, ԱՐՄԵՆՊՐԵՍ: Շիրակի մարզի շրջանավարտներին «Վերջին զանգ»-ի առթիվ շնորհավորելու նպատակով մարզպետ Ֆելիքս Ցոլակյանն այցելեց Ձորակապ համայնքի, Մարալիկի թիվ 1 եւ թիվ 2 միջնակարգ դպրոցներ եւ Ախուրյանի «Նիկոլ Աղբալյանի անվան» վարժարան: Մարզպետը մասնակցեց այս դպրոցներում կազմակեպված «Վերջին դաս» միջոցառումներին: Շնորհավորելով, ինչպես այս, այնպես էլ մարզի մյուս դպրոցների շրջանավարտներին, մարզպետը կոչ արեց բարձր պահել ինչպես հարազատ կրթօջախի, այնպես էլ հայրենի երկրի պատիվը: «Տարին հատկանշական է եւ պարտավորեցնող, քանզի առավել կարեւորվում է ազգային արժանապատվության գիտակցումը: Լինելով գիտելիքահեն հասարակության զարգացման ու առաջընթացի մերօրյա մարտիկները՝ Ցեղասպանության հարյուրամյա տարելիցին դուք թեւակոխում եք կյանքի նոր փուլ, նոր աշխարհ, որտեղ մեծ պատասխանատվություն եւ առաքելություն եք կրելու ձեր ուսերին: Բարձր պահեք ինչպես ձեր հարազատ կրթօջախի, այնպես էլ հայրենքի պատիվը»,- նշեց մարզպետը՝ շրջանավարտներին մաղթելով առողջություն, հաջողություն խելամիտ նախաձեռնություններում եւ իղձերի իրականացում: Շիրակի մարզն այս տարի ունի 2 հազար 282 շրջանավարտ, նրանցից 1012-ը՝ Գյումրիում: 2015 թվականին մարզում ավագ դպրոցն ավարտում է 1110 աշակերտ:
Արմենուհի Մխոյան
Բաժանորդագրվեք մեր ալիքին Telegram-ում