Առկա է բանակցային նոր ձևաչափի որոնման խնդիրը. Ալեքսանդր Մարկարով
ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: Եվրասիական տնտեսական միությանը Հայաստանի անդամակցությունից ի վեր Հայաստան-Եվրամիություն հարաբերություններում առկա է բանակցային նոր ձևաչափի որոնման խնդիրը: «Ռիգայում մայիսի 21-22-ը կայանալիք Եվրամիության Արևելյան գործընկերության գագաթնաժողովի ժամանակ Հայաստանը և Եվրամիության երկրները պետք է որոշեն այն ձևաչափը և խնդիրների սահմանները, որոնք անհրաժեշտ են Հայաստանի հետ նոր բանակցություններ սկսելու համար»,-«Արմենպրես»-ի հետ զրույցում այսպիսի կարծիք արտահայտեց ԱՊՀ երկրների ինստիտուտի երևանյան մասնաճյուղի տնօրեն քաղաքագետ Ալեքսանդր Մարկարովը և հավելեց, որ երկու կողմերն էլ պատրաստակամություն են հայտնել բանակցել նոր համաձայնագրի վերաբերյալ, որը կարող է լինել ավելի սահմանափակ, քան նախորդ բանակցային գործընթացի ժամանակ:
Նա նշեց, որ 2013 թվականին Վիլնյուսում կայացած Արևելյան գործընկերության գագաթնաժողովից հետո եվրոպական գործընկերների մոտ անհրաժեշտություն է առաջացել ձևափոխել Արևելյան գործընկերության երկրների նկատմամբ ունեցած դիրքորոշումը: «Եվրամիությունը Արևելյան գործընկերության բոլոր երկրներին դիտարկում էր գրեթե նույն տեսանկյունից: Սակայն հետագայում պարզվեց, որ իրականությունը շատ ավելի բազմազան է իրենց դոգմատիկ մոտեցումների համեմատ, ինչը պահանջեց ԵՄ-ից վերանայել համագործակցային տեսլականը և մշակել ավելի կատարելագործված համագործակցային մոդելներ»,-շեշտեց Մարկարովը: Քաղաքագետը հավելեց, որ Հայաստանի և Եվրամիության միջև սկզբնական շրջանում կարող է կնքվել մարդու իրավունքներին, ժողովրդավարացմանը կամ կառավարման ոլորտի բարելավմանը վերաբերող համաձայնագիր, որի տնտեսական մասով առկա է բանակցային նոր ձևաչափի որոնման խնդիրը`հաշվի առնելով Հայաստանի անդամակցությունը Եվրասիական տնտեսական միությանը:
Ռիգայում մայիսի 21-22-ը կկայանա Եվրամիության Արևելյան գործընկերության գագաթնաժողովը: Նախատեսվում է, որ դրա ընթացքում Հայաստանն ու Եվրամիությունը կստորագրեն նոր համաձայնագիր: Մինչ այդ նախորդ տարի կողմերն անցկացրել են խորհրդատվական հանդիպումներ` քննարկելով համագործակցության ոլորտներն ու ձևաչափերը:
Բաժանորդագրվեք մեր ալիքին Telegram-ում