Արարատի մարզում նվազել են արտակարգ դեպքերը
ԱՐՏԱՇԱՏ, 4 ՄԱՅԻՍԻ, ԱՐՄԵՆՊՐԵՍ: Արարատի մարզի տարածքում 2015 թվականի առաջին եռամսյակի ընթացքում գրանցվել է 130 արտակարգ դեպք, որոնց հետեւանքով զոհվել են հինգ եւ մարմնական վնասվածք ստացել 58 մարդ:
Ինչպես «Արմնեպրես»-ի թղթակցին տեղեկացրեց Արարատի մարզային փրկարարական վարչության պետ փ/ծ գնդապետ Մուրադ Մարգարյանը, նախորդ տարվա նույն ժամանակաշրջանի համեմատ արտակարգ դեպքերը նվազել են 54-ով, վիրավորների թիվը` 36-ով, զոհերի թիվն աճել է երկուսով:
Առաջին եռամսայակի ընթացքում գրանցված դեպքերից 70-ը տեխնածին են, որոնք կազմում են ընդհանուր դեպքերի 54 տոկոսը: Դրանց հետեւանքով զոհվել է հինգ մարդ եւ վիրավորվել` 18: Տեխնածին բնույթի արտակարգ դեպքերը նվազել են 61-ով:
Նկատելի է, որ նախորդ տարի հրդեհների դեպքերը 2014 թվականի նույն ժամանակահատվածի համեմատ նվազել են 32-ով` հասնելով 61-ի: Դրանք տեղի են ունեցել քաղաքացիներին պատկանող տարածքներում, այրվել է գույք կամ կուտակված անասնակեր: Հրդեհների հետեւանքով հաշվետու ժամանակահատվածում զոհվել են չորս մարդ, վիրավորներ չեն եղել:
Մարգարյանը նշեց նաեւ, որ նախորդ տարվա ընթացքում սոցիալ-կենցաղային բնույթի դեպքերի թիվը հասել է 60-ի, որոնց ընթացքում զոհեր չեն գրանցվել, վիրավորվել են 40 մարդ: Սոցիալ-կենցաղային արտակարգ դեպքերն աճել են ութով:
Լիլիթ Մաճկալյան
Բաժանորդագրվեք մեր ալիքին Telegram-ում