Սուրբ Խաչի Երևման տոնին Սարակապի «Սբ Աստվածածին» եկեղեցում մատուցվեց սուրբ պատարագ
ԳՅՈՒՄՐԻ, 4 ՄԱՅԻՍԻ, ԱՐՄԵՆՊՐԵՍ: Սուրբ Խաչի Երևման տոնին Շիրակի մարզի Սարակապ համայնքի Սբ Աստվածածին եկեղեցում թեմակալ առաջնորդի ձեռամբ մատուցվեց սուրբ պատարագ:
Շիրակի մարզի Անիի տարածաշրջանի նախկին Բոզդողան ներկայիս Սարակապ գյուղը հայտնի է իր 6-7-րդ դդ. Սբ Աստվածածին եկեղեցով: Եկեղեցին, որը եզակի է իր կառուցվածքով՝ խաչաձև, գմբեթավոր, ունի նաև նույնքան հետաքրքիր պատմություն: Երկար տարիներ այն եղել է հողի տակ մինչև գյուղի հովիվներից մեկը հոտն արածեցնելու ժամանակ նկատում է գմբեթի ծայրը: Միայն 13-րդ դարում տարածքի փորման ու մաքրման աշխատաքներից հետո, ոչ միայն հայտնաբերվում է 6-րդ դարի կառույցը, այլ նաև եկեղեցու քահանայի գերեզմանը: Սարակապցիների պատմելով՝ եկեղեցու տարածքում կան այլ գերեզմաններ ևս: Սրանով եկեղեցու հրաշք-պատմությունները չեն ավարտվում: Խորհրդային տարիներին, երբ մյուս եկեղեցիների նման այս եկեղեցին էլ վերածվում է պահեստի, պահեստում աշխատող գյուղացին մի անգամ երազ է տեսնում, Աստծո տեսիլքը հրամայում է մաքրել եկեղեցին: Վերջինս էլ ոչ միայն մաքրում է, այլ նաև կառույցն իր նախնական տեսքին ՝ բերում:
Թեմի առաջնորդ Միքայել սրբազանն իր խոսքում սարակապցիներին կոչ արեց ավելի ուշադիր լինել այն հարստության նկատմամբ, ինչ ունեն: Բոլոր համայնքները չէ, որ ունեն եկեղեցի, այն էլ 6-րդ դարի նման կառույց: Մինչդեռ թեմակալ առաջնորդի առաջին՝ 2006 թվականի այցից հետո, այստեղ ոչինչ չի փոխվել, ինչը սրբազանը վերագրեց գյուղացիների անտարբերությանը:
Ինչպես «Արմենպրես»-ին տեղեկացրեց համայնքի ղեկավար Արծրուն Խաչատրյանը, կառույցը հին է և պատմամշակութայն արժեք ներկայացնող կառույցների ցանկում է: Այդ է պատճառը, որ համայնքը՝ նույնիսկ մեծ ցանկության դեպքում, առանց համապատասխան կառույցի թույտվության հիմանորոգում իրականացնել չի կարող: Միակ ելքն այս դեպքում կլինի եկեղեցու ոչ թե հիմնանորոգումը, այլ պահպանումը, որն իր մեջ կներառի նաև ծածկի կառուցում՝ կանխելով փլուզումները:
Եկեղեցին վերջին անգամ վերանորոգվել է 1887 թվականին և այսօր ունի վերականգնման խիքստ կարիք՝ հիմանականում տանիքի հատվածում:
Սարակապի համայնքապետարանը պատրաստ է համայնքի սուղ միջոցներից գումար հատկացնել գյուղի հնագույն եկեղեցու վերականգման համար: Այդ նպատակով համայնքը 1 մլն դրամ իր բյուջեից կհատկացնի, աշխատանքերի իրականացմանը կաջակցի նաև գյուղացիներից մեկը, ով եկեղեցու խաչի քավորն է: Համայնքի ղեկավարն այդ խոստումը տվեց նաև թեմի առաջնորդին՝ վստահեցնելով, որ նրա հաջորդ այցին եկեղեցին արդեն ավելի բարվոք վիճակում կլինի: Սարակապցիները թեմակալ առաջնորդին երկար սպասեցնել չեն տա՝ փաստեց Արծրուն Խաչատրյանը :
Արմենուհի Մխոյան
Բաժանորդագրվեք մեր ալիքին Telegram-ում