Եղեռնազոհ հայ գրողների ստեղծագործությունների ժողովածուն հանձնվել է գերմանախոս ընթերցողի դատին
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: Եղեռնազոհ հայ գրողների ստեղծագործություններն ամփոփվել են գերմաներեն ժողովածուում և հանձնվել են գերմանախոս ընթերցողի դատին: «Ափ մը մոխիր» խորագրով գիրքը կազմել է գերմանացի գրող, հրապարակախոս, հրատարակիչ Յուրգեն Յանկովսկին: Իր նախաձեռնությամբ ստեղծված մեկ այլ՝ «Ուրացված-մոռացվա՞ծ» ժողովածուում ամփոփվել են գերմանացի և հայ աշակերտների շարադրությունները Հայոց ցեղասպանության մասին։
Երկու գրքերը հանրության դատին ներկայացվեցին ապրիլի 27-ին: Հայաստանի գրողների միության նախագահ Էդվարդ Միլիտոնյանը նշեց, որ նախապես Հայաստանի և Գերմանիայի դպրոցներում հայտարարվել էր շարադրությունների մրցույթ:
«Լավագույններն ամփոփվել են այս գրքում: Հայ և գերմանացի երեխաների մտքերն են: Երկրորդ գրքում զետեղված են մեր եղեռնազոհ տասը գրողների ստեղծագործությունները: Այս ամենը Գերմանիայում իրականացրել է Յուրգեն Յանկովսկին»,- «Արմենպրես»-ի փոխանցմամբ՝ նշեց Էդվարդ Միլիտոնյանը՝ հավելելով, որ Գրողների միությունը ևս մասնակցել է աշխատանքների իրականացմանը: Նա հավելեց, որ երկու գրքերն էլ լույս են տեսել 500 օրինակ տպաքանակով:
Ժողովածուները կազմող Յուրգեն Յանկովսկին, ով մեր երկրում է «Գրական տապան. ապրիլ» փառատոնի շնորհիվ, շնորհանդեսին ընդգծեց. «Ես շատ հպարտ եմ, որ Ցեղասպանության հարյուրամյա տարելիցի կապակցությամբ հրավիրված եմ Երևան: Ուրախ եմ, որ ինձ հետ կարողացել եմ բերել երկու գրքեր, որոնք լույս են տեսել Գերմանիայում»,- նկատեց նա:
Բանասիրական գիտությունների դոկտոր, պրոֆեսոր Կարլեն Մատինյանն հայտնեց, որ մի քանի թարգմանիչներով մասնակցել են եղեռնազոհ գրողների ստեղծագործությունների թարգմանությանը: «Մեր գերմանացի գործընկերների խնդրանքով պատրաստեցինք այս գիրքը, և նրանք արագ և որակով հրատարակեցին Գերմանիայում: Ամփոփել ենք Դանիել Վարուժանի, Սիամանոթոյի, Երուխանի և այլ հեղինակների լավագույն գործերը»,- նշեց նա:
Յուրգեն Յանկովսկին սովորել է Լայփցիգի գրականության ինստիտուտում, աշխատել Հալլեի գրական կենտրոնի արվեստի տանը։ Նա Գերմանիայի գրողների միության, Եվրոպայի գրողների ԿՕԳԳԵ միության և ՊԵՆ-ի անդամ է։ 1996-ին ստացել է «Վոլտեր Բոեր» մրցանակ։ Յանկովսկին ավելի քան 30 գրքերի հեղինակ է։ Գերմանական և արտասահմանյան պարբերականներում հրատարակել է նաև բանաստեղծություններ, էսսեներ։ Նրա գործերը լույս են տեսել Հայաստանում, Ավստրիայում, Բելգիայում, Բոսնիայում և Հերցոգովինայում, Թունիսում, Իսրայելում, Լեհաստանում, Կանադայում և այլ երկրներում։
Բաժանորդագրվեք մեր ալիքին Telegram-ում