ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: Եվրոպայի խորհրդի խորհրդարանական վեհաժողովում թուրքական պատվիրակության անդամներից մեկը ոտքի է կանգնել և մեկ րոպե լռությամբ հարգել է բոլոր ցեղասպանությունների զոհերի հիշատակը: Այս մասին Ազգային ժողովում լրագրողների հետ հանդիպմանը հայտնեց ԵԽԽՎ-ում Հայաստանի պատվիրակության ղեկավար Հերմինե Նաղդալյանը;

«Վեհաժողովի նիստի ընթացքում հայաստանյան պատվիրակության անդամ Լևոն Զուրաբյանն առաջարկեց մեկ րոպե լռությամբ հարգել բոլոր ցեղասպանությունների զոհերի հիշատակը: Առաջարկն ընդունվեց վեհաժողովի նախագահի կողմից, և բոլոր պատվիրակները, բացի թուրքերից, ոտքի կանգնեցին և մեկ րոպե լռությամբ հարգեցին ցեղասպանությունների զոհերի հիշատակը: Թուրք պատվիրակներից միայն մեկն է ոտքի կանգնել, ով նաև խտրականության դեմ հարցերի մշտական հանձնաժողովի նախագահն է: Դրանից հետո մենք տեղեկություններ ստացանք, որ նա հետո մյուս թուրք պատվիրակների հետ խնդիրներ է ունեցել, նրա արարքի հետ կապված պատվիրակության ներսում լուրջ քննարկումներ են ծավալվել»,- «Արմենպրես»-ի հաղորդմամբ՝ ասաց Նաղդալյանը;

Նաղդալյանը նաև հայտնեց, որ ցեղասպանությունների զոհերի հիշատակը հարգելու առաջարկը մնացած պատվիրակություններն արձագանքել են և ոտքի են կանգնել: Ցեղասպանությունների զոհերի հիշատակը հոտնկայս և մեկ րոպե լռությամբ հարգել են նաև ադրբեջանական պատվիրակության ներկայացուցիչները: