Մեկնարկեց Հայաստանի բռնցքամարտի երիտասարդների առաջնությունը
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: Երևանի օլիմպիական հերթափոխի քոլեջի մարզադահլիճում մեկնարկեց բռնցքամարտի Հայաստանի երիտասարդների առաջնությունը, որին մասնակցում են կաշվե ձեռնոցի 100-ից ավելի ներկայացուցիչներ:
Մրցումների առաջին օրը ռինգ դուրս եկան 49 կգ, 52 կգ, 60 կգ, 64 կգ, 69 կգ, և 75 կգ քաշային կարգի բռնցքամարտիկները: 49 կգ քաշային կարգում գեղեցիկ հաղթանակ տոնեց դինամոյական Մհեր Վարդանյանը, ով առավելության հասավ Արմեն Հարությունյանի նկատմամբ:
«Արմենպրես»-ին այս մասին տեղեկացրին բռնցքամարտի ֆեդերացիայից: Այս քաշային կարգում հաղթանակ տոնեցին և հաջորդ փուլի ուղեգիր նվաճեցին նաև Վաղարշակ Սարգսյանը, Կարեն Ղարիբյանը և Արսեն Աբգարյանը: 52 կգ քաշային կարգում իրենց մեկնարկային մենամարտերում հաղթանակ տոնեցին Գարիկ Վարդանյանը,Կարեն Մելքոնյանը, Տիգրան Բաղդասարյանը, Գարեգին Ավանեսյանը, Գրիգոր Սարգսյանը, Մնացական Հարությունյանը և Գրիգոր Ղուկասյանը: 60 կգ քաշային կարգի օրվա միակ մենամարտում Օլիմպիական հերթափոխի քոլեջի սան Աշոտ Մխիթարյանը առավեության հասավ Լեռնային Ղարաբաղի Հանրապետությունը ներկայացնող Դավիթ Մանուկյանի նկատմամբ: 64 կգ քաշային կարգում Մալաթիայի մարզադպրոցը ներկայացնող Արսեն Զախարյանը հաղթեց Սարգիս Մելքոնյանին, իսկ 69 կգ քաշային կարգում Աշոտ Հովեյանը պարտության մատնեց Ռուբիկ Աբրահամյանին: 75 կգ քաշային կարգում հաղթանակ տոնեցին և հաջորդ փուլի ուղեգիր նվաճեցին Վարդան Քոսյանը, Հարություն Ոսկանյանը, Ալյոշա Ստամբուլցյանը, Կարեն Հակոբյանը, Վան Մելքումյանը և Գուրգեն Ուրմուշյանը:
Այսօր ռինգ դուրս կգան 52 կգ, 56 կգ, 69 կգ և 81կգ քաշային կարգի մարզիկները:
Բաժանորդագրվեք մեր ալիքին Telegram-ում