ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ։ Հայաստանի արտադրության ոլորտում կան ոլորտներ, որ կարող են հետաքրքրել  չինացի գործարարներին։ Այս մասին «Արմենպրես»-ի հետ զրույցում ասաց ՀՀ-ում Չինաստանի Ժողովրդական Հանրապետության արտակարգ եւ լիազոր դեսպան Թիան Էրլունին, ով ներկա էր գտնվում Հայաստանում բացված «Made in Armenia» ցուցահանդեսին։ Դեսպանը զարմացած էր սննդի արդյունաբերության, ոսկեգործության և հանքարդյունաբերության ոլորտում հայ գործարարների գրանցած հաջողություններից։ 

«Շատ բացահայտումներ ունեցա այստեղ։ Հետաքրքիր էր, որ սննդի արտադրությունը հայաստանում դինամիկ աճ է գրանցում, իսկ ոսկերչական արտադրությունն ինձ զարմացրեց, քանի որ շատ հետաքրքիր դիզայներական լուծումներ տեսա։ Արդեն մտածում եմ չինացի և հայ գործարարների հնարավոր համագործակցության ոլորտների մասին։ Դեպանատունն էլ աշխատելու է, որ կոնկրետ գործարար համագործակցությունն ամրապնդվի»,- ասաց Թիան Էրլունին։ 

Դեսպան էրլունին երկար ժամանակ անցկացրեց հատկապես հանքարդյունաբերության ոլորտին վերաբերող տաղավարների մոտ, ծանոթացավ բոլոր գործարարների հետ և նրանցից կոնտակտային տվյալներ խնդրեց՝ հետագա համագործակցության համար։ Իսկ որոշ արտադրատեսակներ այնքան էին զարմացրել դեսպանին, որ նա չթաքցրեց հիացմունքն ու ասած, որ տպավորված է հայկական արտադրությամբ։