ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: Աշխարհահռչակ ջազ-դաշնակահար Տիգրան Համասյանը փաստում է՝ հայկակական ռադիոյով և հեռուստատեսությամբ շատ անորակ երաժշտություն են ներկայացնում: «Թումո» ստեղծարար տեխնոլոգիաների կենտրոնում ապրիլի 25-ին անցկացված Երաժշտական համաժողովի ընթացքում Համասյանը նշեց՝ կարևոր է, որ գրաքննություն լինի:

«Ռադիոյով և հեռուստատեությունով 90 տոկոսով աղբ են ներկայացնում: Օրինակ՝ Եվրոպայում էլ, նույնիսկ չափից դուրս ազատ երկրներում, աղբ չեն ցուցադրում»- «Արմենպրես»-ի փոխանցմամբ՝ նշեց նա:

Երգչուհի Լիլիթ Պիպոյանն էլ ընդգծեց, թե հոգնել է այն թեմայի հարցերի պատասխանելուց, թե ինչու են անորակ երգեր հնչում: «Առաջարկն է ձևավորում պահանջարկ և ոչ հակառակը»,-համոզված է նա:

Անվանի կոմպոզիտոր Տիգրան Մանսուրյանը, խնդրի վերաբերյալ խոսելով, նշեց, որ խորհրդային ժամանակաշրջանում ինքնագործ արվեստ լսելու համար տվյալ ստեղծագործությունը պետք է որոշակի հիմնարկներով է անցներ, որ հնչեր, «Երբ մենք փորձեցինք ազատվել գրաքննությունից, հայտնվեցինք այն վիճակում, որում ապրում ենք: Այն ռաբիսը, որը հնչում է, մեր կյանքն է. մեր կյանքը բարելավելն է խնդիրը: Մեր երիտասարդները պետք է գնան այլ երկրներում սովորեն և չսիրեն այս երգերը: Արգելելը սխալ է»,- նշեց նա:

«Թումո» ստեղծարար տեխնոլոգիաների կենտրոնում ապրիլի 25-ին անցկացվեց Երաժշտական համաժողով, որին մասնակցեցին Սերժ Թանկյանը, Տիգրան Մանսուրյանը,  Տիգրան Համասյանը, Լիլիթ Պիպոյանը: System of a Down խմբի մենակատար Սերժ Թանկյանի գլխավորությամբ անցկացվող հանդիպման ժամանակ տեղի ունեցան քննարկումներ հայկական երաժշտության ինքնության և տարբեր մոտեցումների մասին: