Ալ. Սպենդիարյանի տուն-թանգարանում կկայանա «Հարյուր տարի անց» խորագրով միջոցառում
ԵՐԵՎԱՆ, 17 ԱՊՐԻԼԻ, ԱՐՄԵՆՊՐԵՍ: Ալ. Սպենդիարյանի տուն-թանգարանում ապրիլի 21-ին կանցկացվի «Հարյուր տարի անց» խորագրով միջոցառում՝ նվիրված Հայոց ցեղասպանության 100-րդ տարելիցին: Այս մասին «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից:
Արևմտահայության 20-րդ դարասկզբի կոտորածները խորապես ցնցել են Ալեքսանդր Սպենդիարյանին և, որպես ճշմարիտ արվեստագետ, նա չէր կարող անտարբեր մնալ հարազատ ժողովրդի ճակատագրի նկատմամբ: Մեծ եղեռնի իրադարձություններն իրենց արձագանքն են գտել կոմպոզիտորի ստեղծագործություններում. Խաչատուր Աբովյանի «Վերք Հայաստանի» վեպի հիման վրա գրվել է «Այնտե՜ղ, այնտե՜ղ, դեպ վեհ այն դաշտը» ստեղծագործությունը, իսկ Հովհաննես Հովհաննիսյանի խոսքերով` «Առ Հայաստան» վոկալ-սիմֆոնիկ ստեղծագործությունը:
Հարյուր տարի անց, այս ստեղծագործությունները, կրկին իրենց բողոքի, ազատության կանչով՝ որպես արձագանք ժամանակի ոճրագործության, մոմավառության ներքո, կհնչեն կոմպոզիտորի երազանքների օրրանում՝ հայրենիքում: Կցուցադրվեն նաև կոմպոզիտորի ստեղծագործությունների ձեռագիր և տպագիր նոտաները:
Բաժանորդագրվեք մեր ալիքին Telegram-ում