Լիլիան Քեշիշյանը կմասնակցի Մոնտեվիդեոյում կայանալիք Հայոց ցեղասպանության 100-րդ տարելիցին նվիրված միջոցառումներին
ՄՈՆՏԵՎԻԴԻՈ, 17 ԱՊՐԻԼԻ, ԱՐՄԵՆՊՐԵՍ: Ուրուգվայի սպորտի եւ զբոսաշրջության նախարար հայազգի Լիլիան Քեշիշյանը հայտարարել է, որ մասնակցելու է Հայոց ցեղասպանության 100-րդ տարելիցին Մոնտեվիդեոյում կայանալիք բոլոր միջոցառումներին:
Ինչպես հաղորդում է «Արմենպրես»-ը՝ վկայակոչելով Ուրուգվայի սպորտի եւ նախարարության կայքը, Քեշիշյանը շեշտել է, որ թեպետ հայերի թիվը Ուրուգվայում այնքան էլ մեծ չէ, սակայն լատինամերիկյան այդ պետության համար ապրիլի 24-ը շարունակում է մնալ հիշատակի օր: Իր հայտարարության մեջ Քեշիշյանն ընդգծել է, որ երբ արեւմտյան պետությունները ոչինչ չէին ձեռնարկում, Ուրուգվայն աշխարհում առաջին պետությունն էր, որ ճանաչեց Հայոց ցեղասպանությունը: Քեշիշյանը նշել է, որ Հայաստանի եւ Ուրուգվայի միջեւ հարաբերությունները զարգանում են մի քանի ուղղությամբ: Նախարարը նաեւ կարեւորել է Մոնտեվիդեոյում Հայոց ցեղասպանության թանգարանի բացման նախաձեռնությունը:
Բաժանորդագրվեք մեր ալիքին Telegram-ում