Աստանայում կանցկացվի ԵՏՀ Միգրացիոն քաղաքականության հարցերով խորհրդատվական կոմիտեի նիստը
ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Եվրասիական տնտեսական հանձնաժողովի Միգրացիոն քաղաքականության հարցերով խորհրդատվական կոմիտեն Աստանայում կանցկացնի իր երրորդ նիստը: Ինչպես «Արմենպրես»-ին տեղեկացրին ԵՏՀ մամուլի ծառայությունից, ԵՏՀ տնտեսության և ֆինանսական քաղաքականության կոլեգիայի անդամ (Նախարար) Թիմուր Սուլեյմանովի նախագահությամբ անցկացվող նիստը կկայանա ապրիլի 8-ին:
Նիստին ներկա կլինեն Հայաստանի, Ռուսաստանի, Բելառուսի և Ղազախստանի պետական մարմիններից ու բիզնես-համայնքներից Խորհրդատվական կոմիտեի անդամներ, ինչպես նաև Եվրասիական տնտեսական հանձնաժողովի ներկայացուցիչներ:
Օրակարգում ներառված է Եվրասիական տնտեսական միության տարածքում աշխատողների կենսաթոշակների ապահովման պայմանագրի նախագծի շուրջ աշխատանքների քննարկումը:
Կողմերի ներկայացուցիչներին կտեղեկացնեն ԵՏՄ անդամ պետություններում Միության պայմանագրի 16-րդ՝ «Աշխատանքային միգրացիա» բաժնի դրույթները գործնականում կիրառելու մասին, ինչպես նաեւ կքննարկեն ԵՏՄ ներքին սահմաններում սահմանային վերահսկողության դյուրացման մասին առաջարկները:
Բաժանորդագրվեք մեր ալիքին Telegram-ում