ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Այնթապի ասեղնագործության պատմությունն ու ավանդույթներն ամփոփող նոր երկհատորյակ է հրատարկվել, որի առաջաբանը հեղինակել է ՀՀ առաջին տիկին Ռիտա Սարգսյանը: Ապրիլի 1-ին «Մատենադարան» Մեսրոպ Մաշտոցի անվան հին ձե­ռագրերի գիտահետազոտական ինստիտուտում, «Այնթապի օրեր» ծրագրի շրջանակում անցկացվեց ՀԲԸՄ Հալեպի Մ.Սարյանի անվան ակադեմիայի ուսուցիչ Հրազդան Թոքմաջյանի «Այնթապի ասեղնագործությունը» գրքի շնորհանդեսը: Միջոցառումն իր ներկայությամբ պատվեց ՀՀ առաջին տիկին Ռիտա Սարգսյանը:

Գրքի հեղինակ Հրազդան Թոքմաջյանը, ներկայացնելով երկհատորյակը, ցուցադրեց նաև ասեղնագործության նմուշներն ամփոփող լուսանկարներ: «Մեծապես շնորհակալ եմ բոլորից` գրքի լույսընծայման համար: Զույգ հատորների պատրաստումն իրականացվել է Սիրիայում, մեզ նյութերով աջակցել են Լիբանանից և Միացյալ Նահանգներից: Գիրքը երկլեզու է՝ հայերեն և անգլերեն, ունի պատմական, վերլուծական մասեր: Նաև ներառել ենք այն, թե Հայաստանում ինչ թափ ունի Այնթափի ասեղնագործությունը: Կարծում եմ՝ լավ հրատարակություն է` մեր ասեղնագործությանը պատիվ բերող»,- «Արմենպրես»-ի փոխանցմամբ՝ նշեց Հրազդան Թոքմաջյանը՝ հավելելով, որ գրքում կան ձեռագործներ, որոնք այսօր գոյություն չունեն:

Տեր Անուշավան եպիսկոպոս Ժամկոչյանը գրքի ծնունդը երեխայի ծնունդի հետ է համեմատում: Նշում է, որ գիրքը թերթում էր և մտածում, որ այն կարելի է կոչել վկայության հրատարակություն: «Այս հրաշալի վկայությունների գիրքը Ցեղասպանության զոհերի հիշատակը հավերժացնող շատ մեծ ձեռքբերում է: Մեր հայուհիները, ցրվելով աշխարհով մեկ, կարողացել են թողնել այսպիսի հուշարձաններ, որոնք մեր զոհերի հիշատակի լուռ վկայությունն են»,- շեշտեց Անուշավան եպիսկոպոս Ժամկոչյանը:

ՀՀ սփյուռքի նախարար Հրանուշ Հակոբյանն էլ նշեց, որ 95 տարի առաջ տեղի ունեցավ Այնթապի հերոսամարտը, և մեր հայրենակիցները, կորցնելով հայրենիք, մշակույթ, արվեստ, կարողացան ոչ միայն եկեղեցի ու դպրոց կառուցել, այլև մշակույթ ստեղծել: «Սա այն արվեստի վկայությունն է, որ կարողացել են վերաստեղծել մեր կանայք և աղջիկները: Հայ ժողովուրդն իր արվեստով, իրոք, մնայուն է»,- ընդգծեց Հրանուշ Հակոբյանը:

Միջոցառումն ուղեկցվեց նաև գեղարվեստական համարներով: Ներկաները դիտեցին նաև Այնթապի ձեռագործ իրերը, հագուստներն ամփոփող ցուցադրություն:

ՀՀ առաջին տիկին Ռիտա Սարգսյանը խոստովանեց, որ շատ հավանեց ցուցադրությունը: «Ես հավանում եմ ասեղնագործությունը: Ավելին ասեմ, երբ թերթում էի այս գիրքը, մի բան հասկացա, որ հայ կանայք տարբեր տեղերում ապրելով` նույն բաներն էին գործում: Այս գործերը ես տեսել եմ և՛ սկեսուր-մայրիկիս, և՛ տատիկիս, և՛ մայրիկիս մոտ: Ղարաբաղյան պատերազմի ժամանակ ես էլ էի գործում: Շատ ուրախ եմ, որ այսօր կա վինտաժ ոճը, որը մոդայիկ է»,-լրագրողների հետ զրույցում նշեց առաջին տիկինը:

Միջոցառման նախաձեռնողներն էին ՀՀ սփյուռքի նախարարությունը, Հալեպի Հայ Կրթասիրաց մշակութային միությունը, «Փյունիկ» մարդկային ռեսուրսների զարգացման համահայկական հիմնադրամը, Երևանի Մ.Մաշտոցի անվան Մատենադարանը և «Սիրիահայերի հիմնախնդիրները համակարգող կենտրոն» ՀԿ-ն:  

Ռիտա Սարգսյան, Հրանուշ Հակոբյան, Հրազդան Թոքմաջյան, Ռիտա Սարգսյան, Հրանուշ Հակոբյան, Հրազդան Թոքմաջյան, Ռիտա Սարգսյան, Հրազդան Թոքմաջյան Ռիտա Սարգսյան, Հրանուշ Հակոբյան, Արա Խզմալյան Կարեն Արիստակեսյան Հրանուշ Հակոբյան, Կարեն Արիստակեսյան Հրանուշ Հակոբյան Հրանուշ Հակոբյան, Լևոն Սարգսյան Ռիտա Սարգսյան, Հրանուշ Հակոբյան, Հրազդան Թոքմաջյան,

ՀԲԸՄ Հալեպի Մ.Սարյանի անվան ակադեմիայի երկարամյա ուսուցիչ Հրազդան Թոքմաջյանի «Այնթապի ասեղնագործությունը» գրքի շնորհանդեսը. ինչպես նաև` Այնթապի հերոսամարտի դրվագները ներկայացնող լուսանկարների ցուցադրություն: Լուսանկարները` Գևորգ Պերկուպերկյանի